ডুমডুমাত অনুষ্ঠিত বিধায়কৰ প্ৰতিভা সন্ধানী পৰীক্ষা–২০২৫ ; ১৪১৩জন ছাত্ৰ-ছাত্ৰীৰ অংশগ্ৰহণ

ডিজিটেল ডেস্ক : ডুমডুমা বিধানসভা সমষ্টিৰ বিধায়ক তথা অসম চৰকাৰৰ কেবিনেট মন্ত্ৰী ৰূপেশ গোৱালাৰ উদ্যোগত প্ৰতি বছৰৰ দৰে এইবাৰো ডুমডুমা বিধানসভা সমষ্টিৰ অন্তৰ্গত প্ৰাদেশীকৃত আৰু অপ্ৰাদেশীকৃত (ব্যক্তিগত খণ্ডৰ বিদ্যালয়ৰ বাদে) বিদ্যালয়সমূহৰ নৱম শ্ৰেণীৰ ছাত্ৰ-ছাত্ৰীসকলৰ বাবে আয়োজন কৰা হয় ‘বিধায়কৰ প্ৰতিভা সন্ধানী পৰীক্ষা – ২০২৫’। 

এই প্ৰতিভা সন্ধানী পৰীক্ষা আজি দিনৰ ১১ বজাৰ পৰা ১ বজালৈ অনুষ্ঠিত হয়। ১৪১৩ গৰাকীৰ ছাত্ৰ-ছাত্ৰীৰ অংশগ্ৰহণে এই প্ৰতিভা সন্ধানী পৰীক্ষা অধিক জনপ্ৰিয়তাৰ শীৰ্ষত হৈ পৰা পৰিলক্ষিত হয়৷ পৰীক্ষাৰ বাবে ডুমডুমা অঞ্চলৰ চাৰিটা কেন্দ্ৰ ক্ৰমে পিএমশ্ৰী হুনলাল উচ্চতৰ মাধ্যমিক বিদ্যালয়, ডুমডুমা বালিকা উচ্চতৰ মাধ্যমিক বিদ্যালয়, ডুমডুমা বংগীয় বিদ্যালয় আৰু ল'টাছ একাডেমী। 

উল্লেখযোগ্য যে, পৰীক্ষা সমাপ্তিৰ পিছত মাননীয় মন্ত্ৰী ৰূপেশ গোৱালাই পৰীক্ষাৰ্থী ছাত্ৰ-ছাত্ৰীসকলৰ সৈতে পিএমশ্ৰী হুনলাল উচ্চতৰ মাধ্যমিক বিদ্যালয়ৰ মুকলি মঞ্চত এক বিশেষ বাৰ্তালাপ অনুষ্ঠানত অংশগ্ৰহণ কৰে৷ শিক্ষাৰ্থীসকলৰ প্ৰতিভা অন্বেষণ, উৎসাহ বৃদ্ধি আৰু শিক্ষাক্ষেত্ৰত আগবঢ়াই নিয়াৰ লক্ষ্যৰে আয়োজন কৰা এই পৰীক্ষাক লৈ ডুমডুমা অঞ্চলত ব্যাপক উৎসাহ-উদ্দীপনা দেখা গৈছে।