মেঘালয়ত অসমৰ উচ্ছেদিতৰ প্ৰৱেশ নিষিদ্ধ

ডিজিটেল ডেস্ক : অসমত শেহতীয়াকৈ চৰকাৰে চলাই থকা ব্যাপক উচ্ছেদ অভিযানৰ পাছত ভগনীয়া হোৱা সন্দেহজনক নাগৰিকসকল বিভিন্ন স্থানলৈ স্থানান্তৰিত হোৱাৰ পৰিপ্ৰেক্ষিতত চুবুৰীয়া একাধিক ৰাজ্যই এই লোকসকল যাতে তেওঁলোকৰ ৰাজ্যত অনধিকাৰ প্ৰৱেশ কৰিব নোৱাৰে তাৰ বাবে কঠোৰ ব্যৱস্থা গ্রহণ কৰিছে।

আনকি দুয়োখন ৰাজ্যৰ চৰকাৰে এই লোকসকলৰ প্ৰৱেশ ৰোধ কৰাৰ বাবে সীমান্তত কটকটীয়া নিৰাপত্তাৰ ব্যৱস্থা কৰিবলৈ নিজ নিজ ৰাজ্যৰ আৰক্ষী-প্ৰশাসনক কঠোৰ নির্দেশ দিছে। অসমত উচ্ছেদিত লোকে যাতে কোনো কাৰণতে চুবুৰীয়া ৰাজ্যত প্ৰৱেশ কৰিব নোৱাৰে তাৰ বাবে সতর্ক হৈছে দুয়োখন ৰাজ্য।

উল্লেখযোগ্য যে নগালেণ্ডৰ পাছত বৃহস্পতিবাৰে মেঘালয় চৰকাৰে অসমৰ উচ্ছেদ আৰু উচ্ছেদিত সম্পৰ্কত আৰু অসমত হোৱা উচ্ছেদৰ বাবে মেঘালয়ত সম্ভাব্য প্রভাৱ সম্পৰ্কত এখন গুৰুত্বপূৰ্ণ বৈঠক অনুষ্ঠিত কৰিছে। ৰাজ্যখনৰ মুখ্যমন্ত্ৰী কনৰাড চাংমাই ৰাজ্যখনৰ আৰক্ষী, শীর্ষ আমোলা আৰু সীমান্ত জিলাসমূহৰ প্ৰশাসনৰ সৈতে এক গুৰুত্বপূৰ্ণ বৈঠকত বৃহস্পতিবাৰে মিলিত হয়। এই বৈঠকত মুখ্যমন্ত্রী চাংমাই সকলোকে সীমান্ত এলেকাত কটকটীয়া নিৰাপত্তা ব্যৱস্থা গ্ৰহণ কৰাৰ লগতে উচ্ছেদিত যাতে কোনো কাৰণতে মেঘালয়ত প্ৰৱেশ কৰিব নোৱাৰে তাৰ বাবে সীমান্তত চোকা দৃষ্টি ৰাখিবলৈ নির্দেশ দিয়ে।

এই লোকসকলৰ মেঘালয়ত প্ৰৱেশ ৰোধৰ বাবে সীমান্ত সংলগ্ন জিলাসমূহৰ প্ৰশাসন, আৰক্ষী, গাঁওপ্রধান, গাঁওৰক্ষী বাহিনী আৰু স্বেচ্ছাসেৱী অনুষ্ঠানসমূহক সতর্ক হৈ থাকিবলৈ তেওঁ নির্দেশ দিয়ে। প্রণিধানযোগ্য যে মেঘালয়ৰ পূৰ্বে নগালেণ্ড চৰকাৰেও এই সম্পৰ্কত কঠোৰ স্থিতি গ্রহণ কৰি সীমান্ত এলেকা একপ্ৰকাৰ ছীল কৰি দিছে।

উৎসঃ দৈনিক জনমভূমি