ডিজিটেল ডেস্কঃ বেলুচিস্তানত বৃদ্ধি পোৱা বিদ্ৰোহী কাৰ্যকলাপ আৰু পাকিস্তান সেনাবাহিনীৰ অসহায় অৱস্থাক লৈ শেহতীয়াকৈ পাকিস্তানৰ প্ৰতিৰক্ষা মন্ত্ৰী খাৱাজা আছিফে এক চাঞ্চল্যকৰ মন্তব্য কৰিছে।
বেলুচিস্তানত বৰ্তমান তীব্ৰ উত্তেজনা বিৰাজ কৰিছে। চৰকাৰে ১৭০ জনতকৈও অধিক বিদ্ৰোহীক হত্যা কৰা বুলি দাবী কৰিছে যদিও প্ৰতিৰক্ষা মন্ত্ৰীৰ নিজৰ স্বীকাৰোক্তিয়ে পাকিস্তান সেনাৰ দুৰ্বলতাক বিশ্বৰ সন্মুখত উদঙাই দিছে।
পাকিস্তানৰ নেচনেল এচেম্বলীত ভাষণ দি তেওঁ মুকলিকৈ স্বীকাৰ কৰে যে বেলুচিস্তানৰ বিশাল ভৌগোলিক পৰিসৰৰ বাবে পাকিস্তানৰ সুৰক্ষা বাহিনী এতিয়া এক প্ৰকাৰৰ 'শাৰীৰিকভাৱে অক্ষম' হৈ পৰিছে।
বিশাল ভৌগোলিক এলেকা আৰু সেনাৰ প্ৰত্যাহ্বান
প্ৰতিৰক্ষা মন্ত্ৰী খাৱাজা আছিফে জনোৱা মতে, বেলুচিস্তানৰ মাটিকালি পাকিস্তানৰ মুঠ মাটিকালিৰ প্ৰায় ৪০ শতাংশ। ইমান বিশাল আৰু কঠিন পাহাৰীয়া অঞ্চলত বিদ্ৰোহীক নিয়ন্ত্ৰণ কৰাটো পাকিস্তান সেনাবাহিনীৰ বাবে এক অত্যন্ত দুৰূহ কাম হৈ পৰিছে। তেওঁ কয় যে বৰ্তমানৰ পৰিস্থিতিত সৈন্যবাহিনীক এনেদৰে মোতায়েন কৰা হৈছে যে তেওঁলোকে ইমান ডাঙৰ এলেকা এটাৰ প্ৰতি ইঞ্চি পহৰা দিয়াটো অসম্ভৱপ্ৰায়।
বিএলএ-ৰ ভয়াৱহ আক্ৰমণ আৰু ভাইৰেল ভিডিঅ’
শেহতীয়াকৈ বেলুচিস্তান লিবাৰেচন আৰ্মী (BLA)-ই সমগ্ৰ প্ৰদেশখনত চলোৱা ধাৰাবাহিক আক্ৰমণত ৫০ জনতকৈও অধিক লোকে প্ৰাণ হেৰুৱাইছে, যাৰ ভিতৰত ১৭ জনতকৈও অধিক পাকিস্তান সেনাৰ জোৱান আছে। ছচিয়েল মিডিয়াত ভাইৰেল হোৱা এটা ভিডিঅ’ত বিএলএ-ৰ বিদ্ৰোহীসকলে পাকিস্তান চৰকাৰক প্ৰত্যাহ্বান জনোৱা দেখা গৈছে। তেওঁলোকে দাবী কৰিছে যে পাকিস্তান সেনাই কেৱল নিৰস্ত্ৰ সাধাৰণ লোকৰ ওপৰতহে ক্ষমতা প্ৰদৰ্শন কৰে, কিন্তু সজ্জিত বিদ্ৰোহীৰ সন্মুখত তেওঁলোক নিৰূপায়।
মহিলা আত্মঘাতী বোমাৰুৰ ব্যৱহাৰ
আছিফে তেওঁৰ ভাষণত আন এক উদ্বেগজনক তথ্য সদৰী কৰিছে। তেওঁ জনোৱা মতে, বিদ্ৰোহীসকলে এতিয়া সেনাৰ বিৰুদ্ধে মহিলা আত্মঘাতী বোমাৰু ব্যৱহাৰ কৰিবলৈ লৈছে। ইয়াৰ ফলত সুৰক্ষা বাহিনীৰ বাবে পৰিস্থিতি অধিক জটিল আৰু বিপদজনক হৈ পৰিছে।
চৰকাৰৰ কঠোৰ স্থিতি
সেনাৰ অসহায় অৱস্থাৰ কথা স্বীকাৰ কৰিলেও চৰকাৰে বিদ্ৰোহীৰ সৈতে কোনো ধৰণৰ আপোচ নকৰাৰ সিদ্ধান্ত লৈছে।
"যিসকলে নিৰীহ শিশু আৰু নাগৰিকৰ তেজ বোৱাইছে, তেওঁলোকৰ লগত কোনো আলোচনা নহয়। এইসকল কোনো মুক্তি যোদ্ধা নহয়, তেওঁলোক কেৱল সন্ত্ৰাসবাদী," — খাৱাজা আছিফ।
বাহ্যিক শক্তিৰ ওপৰত দোষাৰোপ
প্ৰতিবাৰৰ দৰে এইবাৰো পাকিস্তান চৰকাৰে এই বিদ্ৰোহৰ আঁৰত বিদেশী শক্তি, বিশেষকৈ ভাৰতৰ হাত থকা বুলি অভিযোগ উত্থাপন কৰিছে। অৱশ্যে আন্তঃৰাষ্ট্ৰীয় পৰ্যায়ত এই অভিযোগৰ কোনো দৃঢ় প্ৰমাণ দাখিল কৰিব পৰা নাই পাকিস্তানে।
Continue Reading
