UPSC পৰীক্ষাৰ বাবে প্ৰস্তুতি চলাই থকা সকলক আছুৱে কৰিব সহায়

ডিজিটেল ডেস্কঃ উজানবজাৰৰ শ্বহিদ ভৱনত আছু কেন্দ্ৰীয় সমিতিৰ সংবাদমেল।সংবাদমেল সম্বোধন মুখ্য উপদেষ্টা সমুজ্জ্বল কুমাৰ ভট্টাচাৰ্য, সভাপতি উৎপল শৰ্মা আৰু সাধাৰণ সম্পাদক সমীৰণ ফুকনৰ।অসমৰ পৰা প্ৰশাসনিক বিষয়া সৃষ্টিৰ উদ্দেশ্যে আছুৰ বিশেষ উদ্যোগ।

অসামৰিক সেৱাৰ পৰীক্ষাৰ বাবে আছুৱে হাতত লৈছে 'প্ৰত্যাশা' নামেৰে এক প্ৰকল্প ।প্ৰাৰম্ভিক পৰীক্ষাত উত্তীৰ্ণ হৈ মূল পৰীক্ষাৰ বাবে প্ৰস্তুতি চলোৱা অসমৰ পৰীক্ষাৰ্থীয়ে লাভ কৰিব এই সুবিধা। অসামৰিক সেৱাৰ পৰীক্ষাৰ বাবে দিল্লীত প্ৰশিক্ষণৰ ব্যৱস্থা কৰিব আছুৱে।

বিগত সময়ত UPSC পৰীক্ষাত অসমৰ ফলাফল আশাব্যঞ্জক নহয়। সেয়ে অসমৰ পৰা নিৰ্বাচিত ২৫ গৰাকী পৰীক্ষাৰ্থীক সমৰ্থন আগবঢ়াব আছুৱে। এই ২৫ গৰাকী পৰীক্ষাৰ্থীক তেওঁলোকৰ পছন্দৰ যিকোনো প্ৰতিষ্ঠানত অনলাইন বা অফলাইন প্ৰশিক্ষণ গ্ৰহণৰ ক্ষেত্ৰত আছুৱে সকলো ব্যয় বহন কৰিব।

প্ৰাৰম্ভিক পৰীক্ষাত কৃতকাৰ্যতা লাভ কৰা ইচ্ছ্যুক পৰীক্ষাৰ্থীসকলে www.aasu.org.in ত গৈ আবেদন কৰিব পাৰিব।২৯ জুন পৰ্যন্ত আবেদন প্ৰক্ৰিয়া অব্যাহত থাকিব। জুলাইৰ প্ৰথম সপ্তাহতে নিৰ্বাচিত ২৫ গৰাকী পৰীক্ষাৰ্থীক এই সমৰ্থন আগবঢ়াব আছুৱে।

আনহাতে দ্বিতীয় পদক্ষেপ হিচাপে প্ৰতিবছৰে অসমৰ পৰা ২৬ গৰাকী আৰু উত্তৰ-পূবৰ আন ৰাজ্যৰ পৰা দুগৰাকীকৈ সৰ্বমুঠ ৪০ গৰাকী ছাত্ৰ-ছাত্ৰীক প্ৰশিক্ষণৰ বাবে দিল্লীলৈ প্ৰেৰণৰ সিদ্ধান্ত আছুৰ।দিল্লীত প্ৰশিক্ষণৰ সময়ত সদৌ অসমীয়া ছাত্ৰ সন্থাই সমন্বয় ৰক্ষা কৰিৰ এই প্ৰকল্পৰ।