জুলাইত পৰিবহণ বিভাগৰ 'সম্পূৰ্ণ সেৱা মাহ'

ডিজিটেল ডেস্কঃ পথৰ গুৰুত্বপূৰ্ণ নীতি-নিৰ্দেশনাৰ পৰা আৰম্ভ কৰি যান-বাহনৰ যাৱতীয় নথি-পত্র সঠিক আৰু যান্ত্রিক সকলো দিশ সক্ষম কৰি ৰখাৰ ক্ষেত্ৰত সজাগতা সৃষ্টিত পৰিবহণৰ বিশেষ কৰ্তব্যৰত বিষয়া গৌতম দাসৰ তত্ত্বাৱধানত কামৰূপ মহানগৰ জিলা পৰিবহণ বিভাগে পদক্ষেপ গ্রহণ কৰি আহিছে।

ইয়াৰ অংশ হিচাপে আগন্তুক জুলাই মাহটোক 'সম্পূর্ণ সেৱা মাহ' হিচাপে লৈ পৰিবহণৰ সকলো সেৱা সহজতে উপলব্ধ আৰু থিতাতে সমাধানৰ ব্যৱস্থা গ্ৰহণ কৰা হৈছে।

পৰিবহণৰ বিশেষ কৰ্তব্যৰত বিষয়াগৰাকীয়ে জানিবলৈ দিয়া মতে, সম্পূর্ণ সেৱা মাহৰ কাৰ্যসূচীত বিশেষকৈ ছাত্ৰ-ছাত্ৰী, শিক্ষক-শিক্ষয়িত্রী, চিকিৎসক-অধিবক্তা, সাংবাদিক আৰু বয়োজ্যেষ্ঠ নাগৰিকৰ পৰিবহণৰ লগত জড়িত যিকোনো সমস্যাৰ তাৎক্ষণিক সমাধান আৰু নথি-পত্রসমূহ সঠিক কৰাৰ ক্ষেত্ৰত অগ্ৰাধিকাৰ দিয়া হ'ব।

জুলাই মাহত যিহেতু গৰমৰ বন্ধ, সেয়ে এই সময়ছোৱাত উচ্চতৰ মাধ্যমিকত উত্তীৰ্ণৰ পৰা আৰম্ভ কৰি স্নাতকোত্তৰ আৰু ইয়াৰ সমপৰ্যায়ৰ ছাত্র-ছাত্রীক হোন্ডা ছেফটি ড্রাইভিং এডুকেশ্যন চেণ্টাৰৰ সহযোগত বিশেষ চিমুলেটৰৰ দ্বাৰা বাহন চালনাৰ প্ৰশিক্ষণ প্ৰদান কৰাৰ লগতে বাহন চালনাৰ অনুজ্ঞাপত্ৰ এখন নিজে উলিয়াই ল'ব পৰাকৈ পাৰদৰ্শী কৰি তোলা হ'ব। ঘৰত বহিয়েই পৰিবহণৰ লগত জড়তি ৫৭টাতকৈ অধিক সংস্পর্শবিহীন সেৱা লাভ কৰিব। ফ'নযোগে নিজৰ সমস্যা সন্দৰ্ভত অৱগত কৰিলে গৰাকীৰ ঘৰ অথবা কাৰ্যালয় আদিত উপস্থিত হৈ তাৎক্ষণিকভাৱে সমাধানৰ ব্যৱস্থা কৰিব পৰিবহণৰ সহায়কাৰী বিষয়া-কর্মীৰ দলে।

পহিলা জুলাইৰ পৰা আৰম্ভ হ'বলগীয়া 'সম্পূৰ্ণ সেৱা মাহ'ৰ সময়ছোৱাত বেতকুছিস্থিত পৰিবহণ বিষয়া কাৰ্যালয়ৰ চৌহদত অৱস্থিত হোণ্ডা ছেফটি ড্রাইভিং এডুকেশ্যন চেণ্টাৰত প্রতিটো খোলা দিনত পুৱা ৯ বজাত উপস্থিত হৈ জয়ন্ত কুমাৰ দাস (৯৮৫৯২ ৭৩১৫৫)ৰ লগত যোগাযোগ কৰি বাহন চালনাৰ প্ৰশিক্ষণ গ্রহণ কৰিবলৈ ছাত্র-ছাত্রীসকলক আহ্বান জনোৱা হৈছে।

উৎসঃ দৈনিক জনমভূমি