প্ৰধানমন্ত্ৰী নৰেন্দ্ৰ মোদীয়ে ভংগ কৰিলে ইন্দিৰা গান্ধীৰ অভিলেখ

ডিজিটেল ডেস্ক : নৰেন্দ্র মোদীয়ে একেৰাহে আটাইতকৈ দীঘলীয়া সময় ভাৰতৰ প্ৰধানমন্ত্ৰীৰ পদত থকা দ্বিতীয়জন নেতাৰূপে পৰিগণিত হৈছে। তেওঁ প্রাক্তন প্রধানমন্ত্রী প্রয়াত ইন্দিৰা গান্ধীৰ অভিলেখ ভংগ কৰে।

মোদীয়ে শুকুৰবাৰে দেশৰ প্ৰধানমন্ত্ৰীৰ পদত ৪০৭৮ দিন সম্পূৰ্ণ কৰে। ইয়াৰ লগে লগে ইন্দিৰা গান্ধীয়ে একেৰাহে ৪০৭৭ দিন প্ৰধানমন্ত্ৰীৰ পদত থকাৰ অভিলেখ ভংগ কৰে। ইন্দিৰা গান্ধীয়ে ১৯৬৬ চনৰ ২৪ জানুৱাৰীৰ পৰা একেৰাহে ১৯৭৭চনৰ ২৪ মাৰ্চলৈকে দেশৰ প্ৰধানমন্ত্ৰীৰ পদত আছিল।

একেৰাহে আটাইতকৈ বেছি দিন ভাৰতৰ প্ৰধানমন্ত্ৰীৰ পদত থকাৰ অভিলেখ প্রাক্তন প্রধানমন্ত্রী জৱাহৰলাল নেহৰুৰ। নেহৰুৱে ১৯৪৭চনৰ ১৫ আগষ্টৰ পৰা একেৰাহে ১৯৬৪ চনৰ ২৭ মে'লৈকে মুঠ ৬১২৬ দিন দেশৰ প্ৰধানমন্ত্ৰীৰ পদত আছিল। অৱশ্যে একেৰাহে তিনিবাৰ লোকসভাৰ নিৰ্বাচনত জয়ী হোৱাৰ নেহৰুৰ অভিলেখ যোৱা বছৰ মোদীয়ে স্পর্শ কৰে।

আনহাতে মোদী দেশৰ আটাইতকৈ দীঘলীয়া সময় পদত থকা নেতাৰূপে পৰিগণিত হৈছে। তেওঁ ২০০১ৰ পৰা ২০১৪ চনলৈ গুজৰাটৰ মুখ্যমন্ত্ৰী আৰু তাৰ পাছত ২০১৪ চনৰ ২৬ মে'ৰ পৰা বৰ্তমানলৈকে প্ৰধানমন্ত্ৰীৰ পদত আছে। তেওঁ একেৰাহে ২৪ বছৰতকৈও অধিক সময়ত ৰাজ্য আৰু দেশৰ চৰকাৰৰ মুৰব্বীৰ পদত আছে। ইয়াৰ লগতে তেওঁ স্বাধীনতাৰ পাছত জন্মগ্রহণ কৰা প্ৰথমজন আৰু একেৰাতে দুটা কাৰ্যকাল সম্পূৰ্ণ কৰা প্ৰথমজন অ-কংগ্রেছী প্রধানমন্ত্রী।

উৎসঃ দৈনিক জনমভূমি