মহাৰাষ্ট্ৰৰ পৌৰ নিগমত মিত্ৰতা ৰাজ থাকৰে-একনাথ সিন্দেৰ

ডিজিটেল ডেস্ক : ৰাজনৈতিক মহলক আচৰিত কৰি মহাৰাষ্ট্ৰত একনাথ সিন্দে নেতৃত্বাধীন শিৱ সেনাই ৰাজ থাকৰেৰ মহাৰাষ্ট্ৰ নৱনিৰ্মাণ সেনাৰ (এম এন এছ) সৈতে এখন পৌৰ নিগমত নির্বাচনোত্তৰ মিত্ৰতা কৰাৰ পৰিকল্পনা কৰিছে।

উল্লেখযোগ্য যে কিছুদিন পূৰ্বে ৰাজ থাকৰেৰ এম এন এছে উদ্ধৱ থাকৰে নেতৃত্বাধীন শিৱ সেনাৰ সৈতে বৃহন মুম্বাই পৌৰ নিগমৰ (বি এম চি) নির্বাচনত একেলগে প্রতিদ্বন্দ্বিতা কৰিছিল যদিও বিজেপি আৰু একনাথ সিন্দেৰ শিৱ সেনাৰ মিত্রজোঁটেহে বি এম চিত অধিক সফলতা লাভ কৰিছিল। 

শেহতীয়া তথ্য অনুসৰি, একনাথ সিন্দেৰ শিৱ সেনাই এম এন এছৰ সৈতে কল্যাণ ডমবিভলী পৌৰ নিগমৰ নিৰ্বাচনোত্তৰ মিত্ৰতা কৰাৰ পৰিকল্পনা কৰিছে। আনহাতে, কল্যাণ ডমবিভলী পৌৰ নিগমৰ নিৰ্বাচনত বিজেপিয়ে ৫৩খন, শিৱ সেনা (সিন্দে)ই ৫০খন আসন লাভ কৰিছিল। কিন্তু পৌৰ নিগমখনত সংখ্যাগৰিষ্ঠতাৰ বাবে ৬২খন আসন লাগে। 

ইফালে দুয়োটা দলকে মেয়ৰ পদটো লাগে। এই পৰিপ্ৰেক্ষিতত পৌৰ নিগমখনৰ ক্ষমতা দখলৰ বাবে একনাথ সিন্দেৰ শিৱ সেনাই এম এন এছৰে নির্বাচনোত্তৰ মিত্ৰতা কৰাৰ দিশত আগবাঢ়িছে। এই ক্ষেত্রত দুয়োটা দলৰ নেতাৰ মাজত বৈঠকো হৈছে বুলি জানিব পৰা গৈছে।

উৎসঃ দৈনিক জনমভূমি