দিল্লীত কিশোৰক ছুৰীৰে হানি-খুচি হত্যা: চিচিটিভিৰ সহায়ত মাত্ৰ ৪ ঘণ্টাতে ৰহস্য ফাদিল দিল্লী আৰক্ষীৰ

ডিজিটেল ডেস্কঃ দেশৰ ৰাজধানী দিল্লীৰ উত্তৰ-বাহ্যিক জিলাৰ চিৰচপুৰ অঞ্চলত এজন ১৭ বছৰীয়া কিশোৰক নিৰ্মমভাৱে হত্যা কৰাৰ ঘটনাই সমগ্ৰ অঞ্চলটোত তীব্ৰ চাঞ্চল্যৰ সৃষ্টি কৰিছে।

অৱশ্যে, দিল্লী আৰক্ষীয়ে নিজৰ তৎপৰতা প্ৰদৰ্শন কৰি চিচিটিভি ফুটেজ আৰু কাৰিকৰী অনুসন্ধানৰ সহায়ত ঘটনাৰ মাত্ৰ ৪ ঘণ্টাৰ ভিতৰতে হত্যাকাৰীক কৰায়ত্ব কৰিবলৈ সক্ষম হয়।

আৰক্ষীৰ সূত্ৰ অনুসৰি, এই মৰ্মান্তিক ঘটনাটো যোৱা ২১ জানুৱাৰীৰ সন্ধিয়া প্ৰায় ৭:৩০ বজাত সংঘটিত হৈছিল। মৃত কিশোৰজনে তেওঁৰ বন্ধুসকলৰ সৈতে চিৰচপুৰৰ ৰাণা পাৰ্কত জুইৰ কাষত বহি আছিল। তেনে সময়তে ৬-৭ জনীয়া এটা দল তাত উপস্থিত হয় আৰু কোনো কাৰণ নোহোৱাকৈ কিশোৰজনৰ সৈতে বিবাদত লিপ্ত হয়। বিবাদ তীব্ৰতৰ হোৱাত আক্ৰমণকাৰীৰ দলটোৱে ছুৰী উলিয়াই লয়। কিশোৰজনে দুজনৰ আক্ৰমণৰ পৰা নিজকে বচাবলৈ সক্ষম হৈছিল যদিও তৃতীয়জন অভিযুক্তই তেওঁৰ বুকুত গভীৰভাৱে ছুৰীৰে আঘাত কৰে।

কিশোৰজনক লগে লগে বাবাচাহেব আম্বেদকাৰ চিকিৎসালয়লৈ নিয়া হয় যদিও চিকিৎসকে তেওঁক মৃত ঘোষণা কৰে।

ঘটনাৰ খবৰ পোৱাৰ লগে লগে দিল্লী আৰক্ষীৰ ক্ৰাইম টিম ঘটনাস্থলীত উপস্থিত হয়। অঞ্চলটোৰ চিচিটিভি ফুটেজ পৰীক্ষা কৰাৰ লগতে অভিযুক্তৰ মোবাইল ফোনৰ টেকনিকেল চাৰ্ভিলেন্সৰ সহায় লোৱা হয়। আৰক্ষীয়ে সমগ্ৰ নিশা দিল্লীৰ বিভিন্ন ঠাইত তালাচী চলাই ৫ জন অভিযুক্তক গ্ৰেপ্তাৰ কৰে।

গ্ৰেপ্তাৰ হোৱা অভিযুক্ত কেইজনৰ চিনাক্তকৰণ এনেধৰণৰ:

১. অজয় ওৰফে বিন্ধী

২. ছানী ওৰফে ভটুৰা

৩. সূৰজ

৪. ৰাজু ওৰফে বঙালী

৫. এজন নাবালক

আৰক্ষীয়ে হত্যাকাণ্ডত ব্যৱহাৰ কৰা ছুৰীখন উদ্ধাৰ কৰিছে। অভিযুক্তৰ মাজৰ এজনৰ বিৰুদ্ধে পূৰ্বেও অপৰাধমূলক গোচৰ থকা বুলি আৰক্ষীয়ে জানিবলৈ দিছে। সম্প্ৰতি আৰক্ষীয়ে এই জঘন্য কাণ্ডৰ সৈতে জড়িত আন লোকৰ সন্ধানত অভিযান অব্যাহত ৰাখিছে।