ডিব্ৰুগড়ৰ বিমান বন্দৰত ৰানৱে ফ্ৰিকশ্যন টেষ্ট সম্পন্ন

ডিজিটেল ডেস্ক: বিমান পৰিবহণৰ সুৰক্ষা আৰু আন্তঃগাঁথনিৰ বিশ্বাসযোগ্যতা বৃদ্ধিৰ লক্ষ্যৰে ভাৰতীয় বিমান প্ৰাধিকৰণে কালি ডিব্ৰুগড়ৰ বিমান বন্দৰত এক বিশেষ 'ৰানৱে ফ্রিকশ্যন টেষ্ট' অর্থাৎ ৰানৱেৰ ঘৰ্ষণ পৰীক্ষা সম্পন্ন কৰে।

এই পৰীক্ষাত বিশ্বজুৰি স্বীকৃত আৰ এফ টি নামৰ এক উচ্চ প্রযুক্তিসম্পন্ন বাহন ব্যৱহাৰ কৰা হয়। এই বাহনখন ৰানৱে'ৰ উপৰিভাগৰ ঘৰ্ষণ শক্তি আৰু পিছল প্ৰতিৰোধ ক্ষমতা জুখিবলৈ বিশেষভাৱে তৈয়াৰ কৰা হৈছে। 

বিমান এখন অৱতৰণ কৰাৰ সময়ত চকা আৰু আলকতৰাৰ ৰানৱেৰ মাজত হোৱা তীব্ৰ ঘৰ্ষণৰ ফলত ৰানৱেত ৰবৰৰ আস্তৰণ জমা হয়। সময়ৰ লগে লগে এই আস্তৰণ আৰু পাৰিপাৰ্শ্বিক কাৰকবোৰ মিলি ৰানৱেৰ উপৰিভাগটো অতিশয় পিছল কৰি তুলিব পাৰে। ইয়াৰ ফলত বিশেষকৈ উজনি অসমৰ দৰে অত্যধিক বৰষুণ হোৱা অঞ্চলত বিমানৰ চকা পিছলি যোৱাৰ আশংকা বৃদ্ধি পায়। 

কালি এই পৰীক্ষা আছিল আন্তঃৰাষ্ট্ৰীয় অসামৰিক বিমান পৰিবহণ সংস্থা আৰু ডি জি চি এৰ কঠোৰ সুৰক্ষা মান বৰ্তাই ৰখাৰ এক আগতীয়া পদক্ষেপ। ছাৰছিছ আৰ এফ টি নামৰ এই বিশেষ গাড়ীখনত অত্যাধুনিক চেন্সৰ আৰু এটা জোখ ল'ব পৰা চকা সংলগ্ন হৈ থাকে। ইয়াক ৰানৱেৰ ওপৰেৰে চলাই নি বিমান এখনৰ ব্রেকিং ব্যৱস্থাৰ অনুকৰণত ঘৰ্ষণৰ পৰিমাণ জোখা হয়। এই ব্যৱস্থাৰ জৰিয়তে ৰানৱে'ৰ কোনোবা অংশত ঘর্ষণ শক্তি কমিছে নেকি, তাক নিখুঁতভাৱে চিনাক্ত কৰিব পৰা যায়। 

বিমান বন্দৰৰ এজন বিষয়াই এই সন্দর্ভত কয়: 'যাত্ৰীসকলৰ সুৰক্ষা আৰু বিমান পৰিচালনাৰ শুদ্ধতা আমাৰ সৰ্বোচ্চ অগ্রাধিকাৰ। এনেধৰণৰ কঠোৰ ঘৰ্ষণ পৰীক্ষা চলাই আমি আন্তঃৰাষ্ট্ৰীয় মান বৰ্তাই ৰখাৰ প্ৰতিশ্রুতি পুনৰবাৰ দৃঢ় কৰিছোঁ। ইয়াৰ দ্বাৰা বতৰ যিয়েই নহওক কিয়, সৰু আঞ্চলিক বিমানৰ পৰা আৰম্ভ কৰি ডাঙৰ বাণিজ্যিক বিমানলৈকে সকলোৰে বাবে সঠিক ট্রেক্‌শ্যন আৰু ব্রেকিং ক্ষমতা সুনিশ্চিত কৰা হয়।' 

কালি এই পৰীক্ষাত লাভ কৰা তথ্যসমূহ বিমান বন্দৰৰ ৰক্ষণাবেক্ষণৰ বাবে ব্যৱহাৰ কৰা হ'ব। প্রয়োজন সাপেক্ষে ৰানৱেৰ পৰা জমা হোৱা ৰবৰ আঁতৰোৱাৰ ব্যৱস্থা কৰা হ'ব। এই কাৰিকৰী পৰীক্ষাটো ডিব্ৰুগড়ৰ মোহনবাৰী বিমান বন্দৰক উত্তৰ-পূৰ্বাঞ্চলৰ এক নিৰ্ভৰযোগ্য বিমান কেন্দ্র হিচাপে গঢ়ি তোলাৰ বাবে গ্ৰহণ কৰা সুৰক্ষা পদক্ষেপসমূহৰ এটা অংশ।

উৎসঃ দৈনিক জনমভূমি