শুভাংশু শুক্লাৰ ওভতনি যাত্ৰা ; আজি পৃথিৱীত পদার্পণ কৰিব শুভাংশু শুক্লাই

ডিজিটেল ডেস্ক :ভাৰতীয় মহাকাশচাৰী শুভাংশু শুক্লা আন্তঃৰাষ্ট্ৰীয় মহাকাশ আস্থানৰ পৰা ১৫ জুলাইত পৃথিৱীত উপস্থিত হ'ব।

কেন্দ্রীয় মন্ত্রী জিতেন্দ্র সিঙে দেওবাৰে এক্সিয়ম-৪ মিছনৰ সম্পর্কে জনাই কয় যে শুভাংশু আৰু আন মহাকাশচাৰীকেইজনক পৃথিৱীলৈ ঘূৰাই আনিব লগা মহাকাশযানখনে আজি বিয়লি ৪-৩০ বজাত মহাকাশ আস্থানটো এৰিলে (আনডকিং কৰিলে)।

সিঙে লগতে জনায় যে ১৫ জুলাইৰ বিয়লি ৩ বজাত মহাকাশচাৰী দলটোৱে পৃথিৱীত অৱতৰণ কৰিব। উল্লেখযোগ্য যে আজি বিয়লি ৪-৩০ বজাত শুভাংশু শুল্কা আৰু তেওঁৰ সতীর্থ মহাকাশচাৰীকেইজনক লৈ স্পেচএক্সৰ ড্ৰেগন মহাকাশযানখন লাহে লাহে আন্তঃৰাষ্ট্ৰীয় মহাকাশ আস্থানৰ পৰা পৃথক হ'ব। এই প্রক্রিয়াটো স্বয়ংক্রিয় যদিও ইয়াত থকা মহাকাশচাৰীকেইজনে প্ৰক্ৰিয়াটো নিৰীক্ষণ কৰি থাকে।

মহাকাশ আস্থানৰ পৰা পৃথক হোৱাৰ পাছত লাহে লাহে পৃথিৱী অভিমুখে আগবাঢ়িব। যানখনে পৃথিৱীৰ বায়ুমণ্ডলত প্ৰৱেশ কৰাৰ সময়ত উচ্চ তাপমাত্ৰা আৰু ঘৰ্ষণৰ সন্মুখীন হ'ব। সেই সময়ত যানখনৰ গতি হ'ব প্রতি ঘণ্টাত ২৮ হাজাৰ কিল'মিটাৰ। পৃথিৱীত অৱতৰণ কৰিবলৈ আগবঢ়াৰ সময়ত লাহে লাগে গতিবেগ হ্রাস পাব। বায়ুমণ্ডলত প্ৰৱেশ কৰাৰ পাছত প্রথমে সৰু আৰু পাছত মূল পেৰাছুট খোল খায় আৰু ইয়াৰ ফলত যানখনৰ গতি হ্রাস পাবলৈ ধৰে।

যানখনে ভাৰতীয় সময়মতে, ১৫ জুলাইৰ বিয়লি ৩ বজাত আমেৰিকাৰ কেলিফর্নিয়া উপকূলৰ কাষৰ সমুদ্ৰত অৱতৰণ কৰিব। ড্রেগন যানখনে ৫৮০ পাউণ্ডততৈ অধিক বৈজ্ঞানিক সঁজুলি তথা গৱেষণাৰ তথ্য লৈ পৃথিৱীলৈ উভতিব। আমেৰিকাৰ মহাকাশ গৱেষণা সংস্থা নাছাই প্ৰকাশ কৰা অনুসৰি এই ১৮ দিনীয়া অভিযানটোৰ সময়ত ৬০টাতকৈ অধিক বৈজ্ঞানিক গৱেষণা কৰা হয়। পৃথিৱীলৈ উভতি অহাৰ পাছত শুভাংশু শুক্লা আৰু আন মহাকাশচাৰীকেইজন প্রায় এসপ্তাহ নাছাৰ নিৰীক্ষণত থাকিব।

উৎসঃ দৈনিক জনমভূমি