অসমীয়া সাহিত্যৰ বিশ্বমুখী যাত্রা, 'বুঢ়ী আইৰ সাধু'ৰ ওড়িয়া সংস্কৰণ উন্মোচন

ডিজিটেল ডেস্ক : অসমৰ এগৰাকী বিশিষ্ট লেখক-সাংবাদিক তথা অনুবাদক নৱকুমাৰ মিশ্ৰই অনুবাদ কৰা 'বুঢ়ী আইৰ সাধু'ৰ ওড়িয়া সংস্কৰণ শনিবাৰে ওড়িশাৰ 'ফকীৰ মোহন সেনাপতি বিশ্ববিদ্যালয়'ৰ অৱসৰপ্ৰাপ্ত অধ্যাপক তথা সাহিত্য অকাদেমিৰ সদস্য অধ্যাপক হৰিচন্দ্ৰ বেহৰাই উন্মোচন কৰে।

সাহিত্যৰথী লক্ষ্মীনাথ বেজবৰুৱাৰ স্মৃতি বিজড়িত ওড়িশাৰ সম্বলপুৰৰ কলম নামৰ এক সাংস্কৃতিক গোষ্ঠীৰ সহযোগত গুৱাহাটীৰ 'আজিৰ কবিতা' আৰু মেজাংকৰি প্ৰকাশনে সম্বলপুৰ গংগাধৰ মেহেৰ বিশ্ববিদ্যালয়ৰ প্রেক্ষাগৃহত আয়োজন কৰা ৰাষ্ট্ৰীয় সাহিত্য উৎসৱত এই উন্মোচনী সভা অনুষ্ঠিত হয়।

খিলঞ্জীয়া সুৰক্ষা বাহিনীৰ অসমৰ প্ৰচাৰ সচিব যুগান্ত বায়নে জনোৱা মতে, গংগাধৰ মেহেৰ বিশ্ববিদ্যালয়ৰ উপাচার্য প্রফেছৰ সুশান্ত কুমাৰ দাসে এগছি বন্তি প্রজ্বলন কৰি মুকলি কৰা অনুষ্ঠানত বিশ্ববিদ্যালয়ৰ উপ-পঞ্জীয়ক উমাচৰণ পাটি, ওড়িয়া কবি প্রদীপ পাণ্ডা, বুঢ়ী আইৰ সাধুৰ সম্বলপুৰী ভাষাৰ অনুবাদক ড° গোৱৰ্ধন চাহু, সম্বলপুৰত থকা লক্ষ্মীনাথ বেজবৰুৱাৰ বাসগৃহৰ সংৰক্ষণ সমিতিৰ আহ্বায়ক দীপক পাণ্ডা, প্রাক্তন সাংসদ কুমাৰ দীপক দাস, অসম চৰকাৰৰ সাহিত্যিক বঁটাপ্ৰাপক কৰুণাকান্ত ৰায় আৰু নৱকুমাৰ মিশ্ৰই ৰসৰাজ লক্ষ্মীনাথ বেজবৰুৱাৰ জীৱন পৰিক্ৰমাৰ বিষয়ে বহুমূলীয়া ভাষণ দিয়ে।

অনুষ্ঠানৰ আঁত ধৰে আজিৰ কবিতা আৰু মেজাংকৰি প্ৰকাশনৰ ফালৰ পৰা ড° ভৱেশ দাস আৰু বিনয় চলিহা আৰু সম্বলপুৰৰ কলম গোষ্ঠীৰ তফিজুল ইছলামে। অনুষ্ঠান উপলক্ষে ছট্টিশগড়ৰ ৰাজ্যপাল ৰমেন ডেকাই লিখি পঠিওৱা শুভেচ্ছাবাণীও পাঠ কৰি শুনোৱা হয়।