বিশ্ব জয় কৰি নিজ গৃহত উপস্থিত ভাৰতীয় দলৰ খেলুৱৈ চিমু দাস

ডিজিটেল ডেস্কঃ বিশ্বকাপ জয় কৰি নগাঁৱৰ কঠিয়াতলীৰ স্ব-গৃহত উপস্থিত হ'ল ভাৰতীয় দলৰ খেলুৱৈ চিমু দাস । কঠিয়াতলীৰ বিভিন্ন দল সংগঠনে উষ্ম আদৰণি জনায় চিমু দাসক । 

চিমু দাসৰ সাফল্যত উৎফুল্লিত কঠিয়াতলীবাসী । শাৰিৰীক প্ৰতিবন্ধকতা যে সফলতাৰ হেঙাৰ হ'ব নোৱাৰে সেই কথা পুনৰ প্ৰমান কৰি দিলে নগাঁৱৰ কঠিয়াতলী কছাৰী গাঁৱৰ চিমু দাস নামৰ মহিলা দৃষ্টিহীন খেলুৱৈ গৰাকীয়ে ৷ 

এটি ভঙা পজাঁৰ পৰা খেলিবৰ বাবে ওলাই আহিছিল দৃষ্টিহীন খেলুৱৈ চিমু দাস ৷ তাৰ পাছতে ভাৰতীয় দলৰ হৈ মহিলা দৃষ্টিহীন বিশ্বকাপত অংশ গ্ৰহন কৰি জয়ী হৈ ভাৰতৰ লগতে অসমলৈ গৌৱৰ কঢ়িয়াই আনিলে চিমু দাসে ৷ বিভিন্ন ৬ খন দেশে অংশ গ্ৰহন কৰা টি ২০ বিশ্বকাপত পোন প্ৰথম বাৰৰ বাবে শ্ৰীলংকাৰ কলম্বোত অনুষ্ঠিত হোৱা দৃষ্টিহীন বিশ্বকাপ টি২০ ক্ৰিকেটত নেপালক পৰাস্ত কৰি বিজয়ী হোৱা ভাৰতৰ দলটোৰ খেলুৱৈ আছিল চিমু দাস । 

চিমুৱে ৬৮ ৰাণ কৰি জয়ী কৰিছিল ভাৰতীয় দলটোক ৷ খেলুৱৈ গৰাকী অসমত উপস্থিত হোৱাৰ পাছতে অসম চৰকাৰে ১০ লাখ টকা আৰ্থিক অনুদান প্ৰদান কৰিছে যদিও খেলুৱৈ গৰাকীয়ে বিচাৰিছে এটা চাকৰি ৷ এটা চাকৰি পালে সুখী বুলিও মন্তব্য কৰিছে খেলুৱৈ চিমু দাসে ৷