সুধাকণ্ঠ স্মাৰক মুদ্রাক লৈ সামাজিক মাধ্যমত বিতর্ক

ডিজিটেল ডেস্ক : ভাৰত ৰত্ন ড° ভূপেন হাজৰিকাৰ নামেৰে ১০ টকাৰ এটা স্মাৰক মুদ্রা কেন্দ্ৰীয় চৰকাৰে মুকলি কৰিব। কিন্তু ইয়াৰ পূৰ্বেই সামাজিক মাধ্যমত এই ১০ টকাৰ স্মাৰক মুদ্ৰাৰ ফটো সম্বলিত এটা প'ষ্টক লৈ বিতৰ্কৰ সৃষ্টি হৈছে। যাক লৈ মুখ্যমন্ত্রী ড° হিমন্ত বিশ্ব শর্মায়ো প্রতিক্রিয়া প্রকাশ কৰিছে।

মুখ্যমন্ত্ৰীয়ে কয়- সুধাকণ্ঠ ড° ভূপেন হাজৰিকাদেৱৰ নামেৰে ১০ টকাৰ স্মাৰক মুদ্রা সম্পৰ্কে কৰা এই প'ষ্ট সম্পূৰ্ণৰূপে ভুৱা আৰু মিছা। অনুগ্ৰহ কৰি এনেধৰণৰ ভ্ৰান্ত তথ্য প্ৰচাৰ নকৰিব। অসম আৰক্ষীয়ে এনে বিষয়ত তাৎক্ষণিকভাৱে আইনী ব্যৱস্থা গ্রহণ কৰিব পাৰে।'

উল্লেখযোগ্য যে দেৰগাঁৱৰ ভাস্কৰ বৰা নামৰ এজন ব্যক্তিয়ে ১০ টকাৰ স্মাৰক মুদ্ৰাৰ ফটো সংলগ্ন কৰি সামাজিক মাধ্যমত এইদৰে লিখিছে, 'সুধাকণ্ঠ ড° ভূপেন হাজৰিকাই 'ভাৰত ৰত্ন' দাদা চাহেব ফাল্কে সন্মান, যি পাব লাগে সকলো পালে, এনেদৰে মুখাবয়ৱ সলনি কৰি আৰু সন্মান নিদিয়া হ'লেও হ'লেহেঁতেনে। এইজন আমাৰ চকুৰ আগত ভাহি থকা ভূপেন হাজৰিকাজনতো নহয় কদাপিও।' ইফালে এই প'ষ্টৰ বিৰুদ্ধে মুখ্যমন্ত্ৰী হিমন্ত বিশ্ব শৰ্মাই কৰা মন্তব্যই বিশেষ তাৎপর্য বহন কৰিছে। এতিয়া প্রশ্ন হৈছে কোনে কি উদ্দেশ্যে ১০ টকাৰ স্মাৰক মুদ্ৰাৰ ফটো ছ'চিয়েল মিডিয়াত প্ৰচাৰ কৰিছে?

উৎসঃ দৈনিক জনমভূমি