ক্ৰিকেট খেলুৱৈসকলৰ বাবে সুখবৰ কঢ়িয়াই আনিছে অল ইণ্ডিয়া গ্ৰামীণ ক্ৰিকেট লীগে

ডিজিটেল ডেস্ক: অসমৰ গ্ৰামাঞ্চলৰ ক্ৰীড়া প্ৰতিভাধৰ সকলৰ বাবে এক আশাপ্ৰদ খবৰ কঢ়িয়াই আনিছে অল ইণ্ডিয়া গ্ৰামীণ ক্ৰিকেট লীগে । উল্লেখযোগ্য যে অল ইণ্ডিয়া গ্ৰামীণ ক্ৰিকেট লীগে (AIGCL) বিগত কেইবাবছৰো ধৰি দেশৰ ভিন্ন প্ৰান্তত ক্ৰীড়া প্ৰতিভা বিকশিত কৰাৰ ক্ষেত্ৰত এক গুৰুত্বপূৰ্ণ ভূমিকা গ্ৰহণ কৰি আহিছে । 

বিশেষভাৱে ক্ৰিকেট খেলক গুৰুত্ব প্ৰদান কৰি অহা অল ইণ্ডিয়া গ্ৰামীণ ক্ৰিকেট লীগে এইবাৰ গুৰুত্ব দিব বিচাৰিছে অসমত । নতুন দিল্লীস্থিত কাৰ্যালয়ৰ নিৰ্দেশ অনুসৰি অহা ২১ আৰু ২২ মাৰ্চত দুদিনীয়াকৈ অসমৰ গোলাঘাট,লক্ষীমপুৰ,শিলচৰ আৰু নগাঁৱত অনুস্থিত হ'ব বিশেষ ক্ৰিকেট খেলুৱৈৰ নিৰ্বাচনী শিৱিৰ । অল ইণ্ডিয়া গ্ৰামীণ ক্ৰিকেট লীগৰ উত্তৰ-পূৱৰ চেয়াৰমেন ৰাজুমনি হুছেইনে দেৰগাঁৱত এক সংবাদ মেল সম্বোধন কৰি এই আশাপ্ৰদ খবৰটো ৰাজহুৱা কৰে। 

চেয়াৰমেন গৰাকীয়ে জানিবলৈ দিয়া মতে এই চাৰিওটা স্থানৰ পৰা নিৰ্বাচিত খেলুৱৈ সকলক একত্ৰিত কৰি অসমৰ এটা দল গঠন কৰা হ'ব আৰু দলটোৱে পৰৱৰ্তী পৰ্যায়ত অসমৰ হৈ এপ্ৰিল মাহত মুম্বাইত হব লগীয়া AIGCL T20 প্ৰতিযোগিতাত অংশ গ্ৰহণৰ সুযোগ পাব ৷ 

গ্ৰামাঞ্চলৰ সুযোগ-সুবিধাৰ পৰা বঞ্চিত এই সুপ্ত ক্ৰীড়া প্ৰতিভা সমুহক এখন মঞ্চ দিয়াৰ উদ্দেশ্যৰে জন্ম লাভ কৰা অল ইণ্ডিয়া গ্ৰামীণ ক্ৰিকেট লীগৰ জড়িয়তে অসমৰ পৰা বহু ক্ৰীড়া প্ৰতিভাৰ বিশ্বমুখী যাত্ৰা আৰম্ভ হ'ব বুলি আশাবাদী অল ইণ্ডিয়া গ্ৰামীণ ক্ৰিকেট লীগৰ চেয়াৰমেন ৰাজুমনি হুছেইন । সবিশেষ যোগাযোগ কৰিব পাৰিব 7002323201 নম্বৰটো যোগাযোগ কৰিব পাৰিব৷