অগণন গুণমুগ্ধৰ উপস্থিতিত দালাই লামাৰ ৯০ সংখ্যক জন্মদিন উদযাপন

ডিজিটেল ডেস্ক : দেওবাৰে পুৱা অহা প্ৰবল বৰষুণেও ধৰমশালাত থকা দালাই লামাৰ মন্দিৰ ছুগলাগখাঙৰ মূল প্রাংগণত সমৱেত হাজাৰ হাজাৰ লোকৰ উৎসাহ ম্লান পেলাব পৰা নাছিল।

দেওবাৰে ধৰমশালাৰ উক্ত মন্দিৰত উদযাপন কৰা হৈছিল চতুৰ্দশ দালাই লামাৰ ৯০ সংখ্যক জন্মদিন। চীনে পৰৱৰ্তী দালাই লামাৰ বাছনিৰ বিৰোধিতা কৰাৰ বাবে বৰ্তমানৰ দালাই লামাৰ পাছত উত্তৰাধিকাৰী থাকিব নে নাথাকে সেই লৈ বিশ্বজুৰি গুণা-গঁথা চলি থকাৰ মাজতেই তেওঁৰ জন্মদিন উলহ-মালহেৰে উদযাপন কৰা হয়। এই জন্মদিৱসত তিব্বতী বৌদ্ধৰ বিভিন্ন পন্থাৰ লোক, বিদ্যালয়ৰ শিশু, বিভিন্ন দেশৰ নৃত্যশিল্পী আৰু কণ্ঠশিল্পী তথা বিশ্বৰ বিভিন্ন দেশৰ বৌদ্ধ লোক উপস্থিত আছিল।

দালাই লামা আৰু বিশ্ব শান্তি আৰু ধর্মীয় সমন্বয়ৰ বাবে তেওঁৰ অবিৰত চেষ্টাক সন্মান জনাই দেশ-বিদেশৰ ৰাজনৈতিক নেতাও এই জন্মদিনৰ অংশীদাৰ হৈছিল। এটা ন তৰপীয়া কে'কৰ সন্মুখত বহি উক্ত জন্মদিৱস অনুষ্ঠানত দালাই লামা টেনজিন গিয়াটছোৱে কয়, 'মোৰ ক্ষেত্ৰত, মই বোধিসত্বৰ জীৱনশৈলী শান্তিদেৱৰ বোধিসত্বচৰ্যাৱতাৰলৈ মনত পেলাওঁ। সকলো সংবেদনশীল প্রাণীকে মোৰ আত্মীয় আৰু বন্ধু বুলি বিবেচনা কৰোঁ আৰু মই সদায় সকলো সংবেদনশীল প্রাণীকে মোৰ সৰ্বোচ্চ ক্ষমতাকে সেৱা আগবঢ়োৱাৰ কথা ভাবোঁ।

এই জন্মদিৱস উদযাপনত আপোনালোক অতি আনন্দেৰে ইয়ালৈ আহিছে। সেয়ে আপোনালোকক ধন্যবাদ।' কেন্দ্রীয় মন্ত্ৰী কিৰেন ৰিজিজু আৰু ৰাজীৱ ৰঞ্জন সিং, অৰুণাচল প্ৰদেশৰ মুখ্যমন্ত্ৰী পেমা খাণ্ডু, ছিকিমৰ মন্ত্ৰী ছোনম লামা আৰু হলিউডৰ অভিনেতা ৰিচাৰ্ড গেৰেয়েও ইয়াত সমৱেত লোকসকলৰ আগত ভাষণ দিয়ে।