ডিজিটেল ডেস্কঃ নাহৰকটীয়াৰ বাঁহধাৰীস্থিত অইল ইণ্ডিয়া লিমিটেডৰ NHK--40 ত থকা M-1 ৰিগত বিগত ৩ আগষ্টৰ নিশা দুৰ্ঘটনাত পতিত হৈ কৰুণ মৃত্যুক সাৱটি লৈছিল কিৰণ গগৈ নামৰ এজন যুৱক।
এছিয়ান ড্ৰিলিং টেক নামৰ কোম্পানীয়ে ঠিকা লাভ কৰা এই ৰিগটোত ৩ আগষ্টৰ নিশা কৰ্মৰত হৈ আছিল ড্ৰিলিং ইনচাৰ্জ কিৰণ গগৈ।এডাল প্ৰকাণ্ড পাইপ বাগৰি মূৰত পৰাৰ ফলত কৰুণ মৃত্যক সাৱটি লৈছিল কিৰণে।সেই সময়ত চীনৰ অত্যাধিক পুৰণি সা-সৰঞ্জামেৰে ৰিগত তেল খনন চলোৱাৰ ফলত এনে দুৰ্ঘটনা সংঘটিত হোৱাৰ অভিযোগ তুলিছিল স্থানীয় ৰাইজে।
পিছে এই ঘটনাৰ ১৪ টাকৈ দিন উকলি যোৱাৰ পিছতো আজি পৰ্যন্ত অইল ইণ্ডিয়া লিমিটেডৰ ফালৰ পৰা কিৰণ গগৈৰ পৰিয়ালটোক কোনোধৰণৰ ক্ষতিপুৰণ আদায় দিয়াৰ ব্যৱস্থা নকৰাত এতিয়া ক্ষোভিত হৈ পৰিছে স্থানীয় ৰাইজ।
শনিবাৰে বিভিন্ন দল সংগঠন আৰু স্থানীয় ৰাইজে মৃত কিৰণ গগৈ পত্নী শেৱালী শইকীয়া গগৈক লগত লৈ বিতৰ্কিত তৈল খাদত উপস্থিত হৈ খাদটোত তৈল খনন বন্ধ কৰি দিয়ে।
ইফালে যেতিয়ালৈকে দুৰ্ভগীয়া পৰিয়ালটোৱে উচিত ক্ষতিপূৰণ নাপায় তেতিয়ালৈকে খাদটোত তৈল খনন বন্ধ কৰি ৰখাৰ হুংকাৰ দিয়ে ক্ষোভিত স্থানীয় ৰাইজে।
উল্লেখ্য যে দেওবাৰে অনুষ্ঠিত প্ৰয়াত কিৰণ গগৈৰ আদ্যশ্ৰাদ্ধ।আদ্যশ্ৰাদ্ধৰ আগদিনা এইদৰে এগৰাকী পত্নীয়ে নিজৰ স্বামীৰ প্ৰাপ্য অধিকাৰ বিছাৰি প্ৰতিবাদ কৰিবলগীয়া হোৱা ঘটনাই এতিয়া ব্যাপক প্ৰতিক্ৰিয়াৰ সৃষ্টি কৰিছে ।
Continue Reading
