হেমপ্রভা চুতীয়াৰ হাতত পুনৰ প্ৰাণ পাই উঠিব ষষ্ঠখন ধর্মগ্রন্থই

ডিজিটেল ডেস্ক: পদ্মশ্রী বঁটাৰে সন্মানিত মৰাণৰ শিপিনী হেমপ্রভা চুতীয়াৰ অন্য এক সৃষ্টি সম্পূৰ্ণ হোৱাৰ পথত। তাঁতশালত পুনৰ ব'বলৈ আৰম্ভ কৰিছে তেওঁ এইবাৰ ষষ্ঠখন ধৰ্মগ্রন্থ নামঘোষাৰ ইংৰাজী আৰু হিন্দী সংস্কৰণ। তাঁতশালত নিখুঁতভাৱে ব'বলৈ ধৰিছে ধৰ্মগ্রন্থখন।

২০১৩ চনৰ পৰা তাঁতশালত ধর্মগ্রন্থ বৈ থকা হেমপ্রভা চুতীয়াই ইতিমধ্যে গুণমালা, নামঘোষা, ভাগৱত গীতা সংস্কৃত আৰু ভাগৱত গীতা ইংৰাজীত বৈ উলিয়াইছে। ইয়াৰ বাবে তেওঁক ২০২২ বৰ্ষত ৰাজ্য চৰকাৰে অসম গৌৰৱ বঁটা আৰু ২০২৩ বৰ্ষত ভাৰত চৰকাৰে পদ্মশ্রী বঁটা প্ৰদান কৰিছিল।

শেহতীয়াকৈ তেওঁ এই ষষ্ঠখন ধর্মগ্রন্থ বৈ অন্য এক চমক সৃষ্টিৰ বাবে হাতে- কামে লাগি গৈছে। অন্যহাতে, হেমপ্রভা চুতীয়াৰ সৃষ্টিৰাজি সংৰক্ষণৰ বাবে তিলমানো গুৰুত্ব নিদিয়াৰ অভিযোগ তুলিছে কাজী শিপিনীগৰাকীয়ে। এটা সংগ্ৰহালয় নিৰ্মাণৰ বাবে চৰকাৰৰ ওচৰত আৱেদন কৰি কৰি ভাগৰি গৈছে শিপিনীগৰাকী।

চুতীয়া উন্নয়ন পৰিষদৰ এটা পুঁজিৰে কাৰ্যালয় নিৰ্মাণ হ'ল যদিও সংগ্রহালয় নিৰ্মাণৰ বাবে অসম চৰকাৰে আজিও কোনো সঁহাৰি দিয়া নাই। যাৰ বাবে কোনো কোনো সময়ত থমকি ৰ'ব লগা হৈছে শিপিনীগৰাকী। তেওঁ মুখ্যমন্ত্ৰীগৰাকীক এটা সংগ্ৰহালয় নিৰ্মাণৰ বাবে আহ্বান জনাইছে।

উৎসঃ দৈনিক জনমভূমি