মঙলদৈত বোৱাৰীৰ ৰুদ্ৰমুৰ্তি; মাকৰ ঘৰলৈ ঘনাই যোৱাত বাধা দিয়াৰ বাবে প্ৰহাৰ শাহুক

ডিজিটেল ডেস্ক : চ'তৰ মাহত বৰদৈচিলা মাকৰ ঘৰলৈ যোৱাৰ কথা হয়তো আপোনালোকে শুনিছে কিন্তু এইবাৰ মাকৰ ঘৰলৈ যাবলৈ ওলাওতেই লাগিল কেনা ।এগৰাকী বোৱাৰীয়ে মছলা বতা শিলেৰে মৰিয়াই লেবেজান কৰিলে নিজ শাহুক ।

এই ঘটনা মঙলদৈ ৫ নং ওৱাৰ্ডৰ ।শাহুক প্ৰহাৰ কৰি গুৰুত্বৰ ভাৱে আঘাতপ্ৰাপ্ত শাহুৰ কাষতে ৬ মহীয়া শিশুক এৰি থৈ মাকৰ ঘৰলৈ গুচি গল বোৱাৰী। ঘটনা অনুসৰি মঙলদৈ ৫ নং ওৱাৰ্ডৰ বাসিন্দা কৰিম আলিৰ পত্নী জৰিফুল বেগমে পিতৃ সহ কেইবাজনো ব্যক্তিৰ সহায়ত শনিবাৰে প্ৰায় ৯/১০ মান বজাত শাহুৱেক কৰিমা বেগমক মচলা পিসা শিলেৰে উপৰ্যুপৰি প্ৰহাৰ কৰে ।

বোৱাৰী জৰিফুল বেগমে শাহুক মাৰপিট কৰি নিজৰে ৬ মহীয়া কন্যা সন্তানটিক গুৰুত্বৰ ভাৱে আঘাতপ্ৰাপ্ত শাহুয়েকৰ কাষতে পেলাই থৈ মাকৰ ঘৰলৈ গুচি যায়। স্বামী কৰিম আলি ঘৰত নথকাৰ সুযোগ লৈ এই কাণ্ড সংঘটিত কৰে পত্নীয়ে। পিছত স্বামী কৰিম আলি ঘৰত উপস্থিত হৈ লগে লগে আঘাতপ্ৰাপ্ত মাতৃক সংকটজনক অৱস্থাত মঙলদৈ অসামৰিক চিকিৎসালয়ত ভৰ্তি কৰায়।

এইক্ষেত্ৰত কৰিম আলিয়ে পত্নীসহ আনকেইজন সহযোগীৰ বিৰুদ্ধে মঙলদৈ থানাত এজাহাৰ দাখিল কৰে।মাৰপিতৰ ঘটনা কিয় সংঘটিত হল সেইয়া এতিয়াও স্পষ্ট হোৱা নাই যদিও বোৱাৰী জনী সঘনাই মাতৃ গৃহলৈ গৈ থকাৰ বাবে পূৰ্বৰ পৰাই শাহু বোৱাৰীৰ মাজত মতানক্য চলি থকা বুলি জানিব দিয়ে স্বামী কৰিম আলিয়ে।