কলিয়াবৰত বহু চৰ্চিত এটি ভিডিঅ' ক্লিপ ; এজন যুৱকক পৰিকল্পিত ভাবে হত্যা কৰি দুৰ্ঘটনাৰ ৰূপ দিয়াৰ চেষ্টাৰ অভিযোগ

ডিজিটেল ডেস্কঃ নাৰী মমতাময়ী ,নাৰী স্নেহশীলা , এক কোমল হৃদয় দি ঈশ্বৰে সৃষ্টি কৰিছে নাৰীক । পিছে এশ শতাংশ নাৰীৰ ক্ষেত্ৰত শুদ্ধ নহয় এই কথা । নিষ্ঠুৰ আৰু হৃদয়হীন নাৰীও দেখা যায় আজিৰ সমাজত । কিমান কঠোৰ, কিমান নিষ্ঠুৰ হলে বাৰু মানুহে মৃত্যু যন্ত্ৰনাত চটফটাই থকা কোনো লোকক সহায়ৰ বাবে আগবাঢ়ি নোযোৱাকৈ থাকিব পাৰে ?

এখন বাইকৰ তলত চেপা খাই পৰি আছে এজন যুৱক । উদ্ধাৰৰ বাবে হয়তো চিঞৰিছে কাৰোবাৰ সহায় বিচাৰি । দুপাল পিতা বৰষুণ , যুৱকজনৰ মৃত্যুৰ কাতৰ চিঞৰ । তাৰ মাজতে চকা-চমকা কৈ দেখা গল দুগৰাকী নাৰীয়ে টৰ্চ লাইটৰ পোহৰ পেলাই মটৰ চাইকেলৰ সৈতে মৃত্যুমুখী যুৱকজনক চাই থকাৰ দৃশ্য । যুৱক জনৰ মৃত্যু কাতৰ চিঞঁৰ , সহায়ৰ আহ্বান নেওচি কিছু সময় ৰ পাছত অন্তৰ্ধান হয় সেই দুই নাৰী । তাৰ পাছতেই হয়তো সকলো শেষ হৈ গৈছিল । আন্ধাৰৰ তোলা এটি ভিডিও ক্লিপত ছায়ামায়াকৈ দেখা পোৱা সেই ৰহস্যময়ী মহিলা দুগৰাকী কোন আছিল ? যুৱক জনক বচোৱাৰ কোনো চেষ্টা নকৰি কিয় মনে মনে আঁতৰি গৈছিল মহিলা দুগৰাকী ? এজন সবল সুঠাম ডেকাৰ মৃত্যু যন্ত্ৰণা কেনে দৰে উপভোগ কৰিব পাৰে নাৰীয়ে ?এই লৈ কলিয়াবৰত চলিছে এক চৰ্চা ।

যোৱা বৃহস্পতিবাৰে নিশা কলিয়াবৰৰ বাঘৰচুক গাওঁত উদ্ধাৰ হৈছিল এজন যুৱকৰ মৃতদেহ । বালিটিকা গাওঁৰ মিন্টু বৰা নামৰ যুৱকজনৰ মৃতদেহ উদ্ধাৰ হৈছিল বাঘৰচুক গাওঁৰ দিপালী বৰা নামৰ মহিলা গৰাকীৰ ঘৰৰ চৌহদত । এখন বাইকে হেঁচা মাৰি ধৰি থকা অৱস্থাত আৰক্ষীয়ে উদ্ধাৰ কৰিছিল যুৱক জনৰ মৃতদেহ । প্ৰাথমিক পৰ্য্যায়ত আৰক্ষীয়ে এয়া এক দুৰ্ঘটনা বুলি মন্তব্য কৰিছে যদিও ৰাইজে ইয়াক মানি লব বিচৰা নাই ।

আনহাতে উল্লেখিত ভিডিঅ'তো ভাইৰেল হোৱাৰ পাছত ৰাইজে হত্যাকাণ্ড বুলি সন্দেহ কৰিছে । এই ঘটনাৰ সু বিচাৰ দাবী কৰি স্থানীয় ৰাইজে দিপালী বৰাৰ ঘৰ ঘেৰাও কৰি প্ৰতিবাদো সাব্যস্ত কৰে । শেহতীয়াভাবে দিপালী বৰাৰ পৰিয়ালে হত্যাকাণ্ড সংঘটিত কৰি দুর্ঘটনাৰ ৰূপ দিয়া বুলি অভিযোগ উত্থাপন কৰি মিন্টু বৰাৰ পৰিয়ালে শিলঘাট আৰক্ষীৰ হাতত এখন এজাহাৰ দাখিল কৰিছে । সেই ভিডিও ক্লিপ , মৰণোত্তৰ পৰীক্ষাৰ প্ৰতিবেদন , আন আন তথ্য পৰীক্ষা কৰি আৰক্ষীয়ে কৰা তদন্তৰ পাছতহে পোহৰলৈ আহিব মিন্টু বৰাৰ মৃত্যুৰ প্ৰকৃত সত্যটো ।

মিন্টু বৰাৰ মৃত্যু দুৰ্ঘটনা নে হত্যাকাণ্ড এই প্ৰশ্নৰ উত্তৰতকৈ ভিডিও ক্লিপ ত দেখা ৰহস্যময়ী মহিলা দুগৰাকী কোন আছিল , যুৱক জনক বচাবলৈ নিজে অথবা আনৰ সহায় কিয় বিচৰা নাছিল । যুৱক জনৰ মৃত্যু কাতৰ যন্ত্ৰণা উপভোগ কৰি দিপালী বৰাৰ ঘৰৰ দিশে গুচি যোৱা মহিলা দুগৰাকী কোন আছিল , আৰক্ষীৰ তদন্তত পোহৰলৈ আহিবনে এইবোৰ কথা ? মিন্টু বৰাৰ মৃত্যুত পৰোক্ষ ভাবে হলেও এই ৰহস্যময়ী নাৰী দুগৰাকী হাত আছিল নেকি ? আৰক্ষীৰ তদন্তৰ আওতালৈ এই বিষয়বোৰ অহাটো বিচাৰিছে মিন্টু বৰাৰ পৰিয়াল তথা স্থানীয় ৰাইজে ।