ডায়মণ্ড চিটি খ্যাত গুজৰাটৰ অঞ্চলটোত নাথাকিব দৰিদ্ৰতাৰ চিন, দেশৰ প্ৰথমখন 'বস্তিমুক্ত' চহৰ ছুৰাট

ডিজিটেল ডেস্ক: ভাৰতৰ প্রথমখন 'বস্তিমুক্ত' নগৰাঞ্চল হিচাপে খ্যাতি অর্জনৰ দিশে আগবাঢ়িছে 'ডায়মণ্ড চিটি' হিচাপে জনাজাত ছুৰাটে। দেশৰ নগৰ-চহৰসমূহত যিদৰে এফালে গগনচুম্বী অট্টালিকা, বিশাল বিশাল শ্বপিং মল আছে, ঠিক সেইদৰে বহু বস্তিও আছে, য'ত দৰিদ্রতাৰ গ্ৰাসত পৰা এখন সমাজ বাস কৰে। 

দেশৰ চৰকাৰ প্রশাসনে ধনী-দুখীয়াৰ মাজৰ এই বৈসাদৃশ্য আঁতৰাবলৈ বিভিন্ন পদক্ষেপ হাতত লৈ আহিছে। তাৰেই ফল হিচাপে বস্তিমুক্ত হোৱাৰ পথত আগবাঢ়িছে গুজৰাটৰ ছুৰাট নগৰী। ছুৰাট পৌৰ নিগমে প্রধানমন্ত্রী আৱাস যোজনা আৰু ৰাজ্যিক গৃহ নির্মাণ নীতিৰ জৰিয়তে নগৰখনৰ বস্তিৰ লোকসকলক স্থায়ী ঘৰ দিয়াৰ বাবে ইতিমধ্যেই আঁচনি ৰূপায়ণ কৰিছে। 

পৌৰ নিগমে নিগমৰ অধীনস্থ অঞ্চলৰ প্রতিজন লোকেই যাতে ৰ'দ-বৰষুণত সমস্যা নোহোৱাকৈ এটা ভাল ঘৰত থাকিব পাৰে, তাৰ ব্যৱস্থা কৰাৰ বাবে বস্তি অঞ্চলত বহু মহলীয়া এপার্টমেন্ট নির্মাণ কৰি দিছে। এই এপার্টমেন্টত নিম্ন আয় আৰু মধ্যম আয়ৰ যিকোনো লোক সুন্দৰভাৱে থাকিব পাৰিব বুলি পৌৰ নিগমৰ সূত্রই প্রকাশ কৰে। এনে নিম্ন আয়ৰ বহু লোকে বস্তিৰ ঘৰ এৰি ইতিমধ্যেই ফ্লেটত আশ্রয় লৈছে।

উৎসঃ দৈনিক জনমভূমি