আজি ভোগালী বিহুৰ উৰুকা, ভোগৰ সামগ্ৰীৰে উভৈনদী বজাৰ

ডিজিটেল ডেস্ক : ৰাজ্যৰ চৌদিশে এতিয়া উখল-মাখল পৰিৱেশ। কিয়নো আজি ভোগালী বিহুৰ উৰুকা। ভোগ-ৰসৰ সম্ভাৰ লৈ আহিল হেঁপাহৰ ভোগালী। ভোগালীৰ উৰুকাৰ আনন্দ-উদ্দীপনাই আন্দোলিত কৰিছে প্ৰতিজন লোকক। উৰুকাৰ নিশা লগে-ভাগে এসাঁজ খোৱাৰ পৰম্পৰাক সাকাৰ ৰূপ দিবলৈ গাঁৱে-ভূঁইয়ে, চহৰে-নগৰে এতিয়া ব্যস্ততাৰ অন্ত নাই। পচন্দ অনুসাৰে গ্ৰাহকে ক্ৰয় কৰিছে প্ৰতিপদ সামগ্ৰী। 

আনন্দ মনে পৰিয়ালৰ সৈতে সকলোৱে নিশা গ্ৰহণ কৰিব উৰুকাৰ ভাতসাঁজ। যি সাঁজ ভাতত আছে আনন্দ, তৃপ্তি, প্ৰশান্তি আৰু প্ৰাপ্তিৰ অনাবিল আনন্দ। সকলোৰে মনত আজি ভোগৰ সামগ্ৰীৰে ঘৰখন ভৰাই তোলাৰ হেঁপাহ। ভোগৰ ভোগজৰা লৈ প্ৰতিটো পৰিয়ালৰ চোতালত, আখলত, ভঁৰালত হেঁপাহৰ ভোগালীৰ ছবিখন দেখিবলৈ পোৱা যায় । উৰুকাত সকলোৱে আজি হাঁহে-মাহে এসাঁজ খোৱাৰ প্ৰস্তুতি চলাইছে । কাহিলীপুৱাতেই ৰাজ্যৰ বিভিন্ন প্ৰান্তৰ মাছৰ বজাৰত ৰাইজ উপস্থিত হয় নিজৰ পচন্দৰ মাছটো বিচাৰি। চিতল, ৰৌ, আৰি, ভকুৱা, বৰালী মাছৰ সমাহাৰে আজি নতুন ৰূপ পালে প্ৰতিখন বজাৰ।  

হেঁপাহৰ বিহুটিৰ আনন্দ উপভোগৰ মনোৰথেৰে ৰাজ্যৰ সৰ্বপ্ৰান্তত ডেকা-গাভৰুৰ পৰা আবাল-বৃদ্ধ-বনিতালৈ সকলোৱে হাতে কামে লাগিছে বিহুৰ প্ৰস্তুতিত। পথাৰত নিৰ্মাণ কৰা ভেলাঘৰসমূহতো ভোজভাত খাব গাঁওবাসীয়ে। আজি উৰুকাৰ নিশা এই ভেলাঘৰৰ উম লৈ সকলোৱে ভোগৰ এসাঁজ খাই গীত-মাতেৰে আনন্দ কৰিব আৰু কাইলৈ পুৱাই অগ্নিদেৱতাক সেৱা জনাই মেজি প্ৰজ্বলন কৰিব। আনহাতে প্ৰতিঘৰ অসমীয়াৰ পাকঘৰত এতিয়া তিল পিঠা, ঘিলা পিঠা, চিৰা-দৈ আৰু লাৰুৰ সুবাস। গাঁৱৰ বোৱাৰী-জীয়ৰী ব্যস্ত হৈ পৰিছে ভোগালীৰ জলপান প্ৰস্তুত কৰাত। এনেদৰে আজি আনন্দ মনে সকলোৱে উদযাপন কৰিব হেঁপাহৰ ভোগালী বিহুৰ উৰুকাটি।

উৎসঃ দৈনিক জনমভূমি