অম্বুবাচীলৈ অহা বহিঃৰাজ্যৰ ভক্তক আদৰণি ; কামাখ্যা ষ্টেছনত ভক্তৰ সৈতে পৰ্যটন মন্ত্ৰীৰ মত-বিনিময়

ডিজিটেল ডেস্কঃ এইবাৰৰ অম্বুবাচী মহাযোগলৈ ৰাজ্যখনৰ বাহিৰৰ পৰা অহা ভক্তসকলক অসমবাসীৰ হৈ উষ্ম আদৰণি জনোৱাৰ বাবে বিশেষ পদক্ষেপ লোৱা হৈছে যাতে বাহিৰৰ পৰা অহা ভক্ত তথা পর্যটকসকলে আতিথ্যৰ এক বিশেষ বার্তা কঢ়িয়াই লৈ যাব পাৰে।

ইয়াৰ অংশ হিচাপে ৰাজ্য চৰকাৰৰ পৰ্যটন আদি বিভাগৰ মন্ত্ৰী ৰঞ্জিত কুমাৰ দাসে সোমবাৰে গুৱাহাটীৰ কামাখ্যা ৰেল ষ্টেছনত আবেলি উপস্থিত হৈ অম্বুবাচী মহাযোগলৈ অহা ভক্তসকলক অসমবাসীৰ হৈ উষ্ম আদৰণি জনোৱাৰ লগতে মত-বিনিময় কৰে।

অতিথিসকলক আদৰণি জনোৱাৰ লগতে মন্ত্ৰী গৰাকীয়ে আদৰণী পৰ্বত নিয়োজিত বিভিন্ন স্বেচ্ছাসেৱী সংগঠনৰ কৰ্মকর্তাসকলকো উৎসাহিত কৰে। উল্লেখযোগ্য যে অম্বুবাচী মহাযোগৰ লগত সংগতি ৰাখি ৰাজ্য চৰকাৰৰ পৰ্যটন বিভাগৰ তৰফৰ পৰাও 'প্রণাম' নামেৰে প্ৰথমবাৰৰ বাবে কামাখ্যা ৰেল ষ্টেছন, পাণ্ডু প'র্ট, ভূতনাথ, কামাখ্যা নামনি আৰু আদাবাৰীত ৫টা আদৰণী কক্ষ স্থাপন কৰি ভক্তসকলক আদৰণি জনোৱাৰ ব্যৱস্থা কৰিছে।

তদুপৰি পৰ্যটন বিভাগৰ তৰফৰ পৰা ৪টা ভাষাত ছপোৱা আদৰণী পুস্তিকা আদি বিতৰণৰো দিহা কৰা হৈছে। ইতিমধ্যে সহস্রাধিক ভক্তই মা কামাখ্যা মন্দিৰৰ দুৱাৰদলিত প্রতিঘণ্টাত প্ৰৱেশ কৰি আছে। সকলো ভক্তকে যাতে এষাৰ মাত লগাব পৰা যায় তাৰ বাবে বিভিন্ন দল-সংগঠনৰ কার্যকর্তাসকলে 'অতিথি দেৱো ভৱঃ' মনোভাৱেৰে প্ৰয়াস অব্যাহত ৰাখিছে।

উৎসঃ দৈনিক জনমভূমি