ডিজিটেল ডেস্কঃ হিকটি অহাটো আমাৰ বাবে অতি স্বাভাৱিক আৰু সাধাৰণ ঘটনা। বহু সময়ত ঠাণ্ডা পানী খালে, অতিপাত হাঁহিলে বা খৰকৈ আহাৰ গ্ৰহণ কৰিলে হিকটি আহে। কিন্তু কেতিয়াবা এই হিকটি বিৰক্তিৰ কাৰণ হৈ পৰে, বিশেষকৈ যদি ই দীৰ্ঘ সময় ধৰি চলি থাকে। চিকিৎসা বিজ্ঞানৰ ভাষাত হিকটিক 'Hiccups' বুলি কোৱা হয়।
হিকটি কিয় হয়?
আমাৰ হাওঁফাওঁৰ তলত থকা শ্বাস-প্ৰশ্বাসৰ পেশী যাক 'ডায়েফ্ৰাম' (Diaphragm) বুলি কোৱা হয়, সেইটো হঠাৎ অনিচ্ছাকৃতভাৱে সংকুচিত হ'লে আৰু তাৰ লগে লগে কণ্ঠতন্ত্ৰ (Vocal cords) বন্ধ হৈ গ'লে যি শব্দৰ সৃষ্টি হয়, তাকে হিকটি বোলে।
হিকটি অহাৰ সাধাৰণ কাৰণসমূহ:
১/ অতি খৰকৈ বা বেছিকৈ আহাৰ খোৱা।
২/ অত্যাধিক কাৰ্বনেটেড পানীয় বা মদ্যপান।
৩/ মানসিক চাপ, উত্তেজনা বা ভয় খালে।
৪/ হঠাতে বায়ুমণ্ডলৰ উষ্ণতা সলনি হ'লে।
৫/ চ্যুইংগাম খোৱাৰ সময়ত মুখৰ ভিতৰলৈ অতিৰিক্ত বতাহ সোমালে।
হিকটিৰ বিভিন্ন প্ৰকাৰ:
ক্ষণস্থায়ী হিকটি: যিটো মাত্ৰ কেইছেকেণ্ডমান বা কেইমিনিটমানৰ বাবে থাকে।
পুনৰাবৃত্তিমূলক হিকটি: যিবোৰ বাৰে বাৰে আহে আৰু কিছু বেছি সময় থাকে।
নৱজাতকৰ হিকটি: সৰু ল'ৰা-ছোৱালীক গাখীৰ খুউৱাৰ পাছত পেটত বতাহ সোমালে বা গেষ্ট্ৰিক ৰিফ্লাক্সৰ বাবে প্ৰায়ে হিকটি আহে।
ঘৰুৱা প্ৰতিকাৰ
যদি হিকটি সহজতে বন্ধ হোৱা নাই, তেন্তে তলত দিয়া উপায়সমূহ অৱলম্বন কৰিব পাৰে:
কিছু সময়ৰ বাবে (১০-১৫ ছেকেণ্ড) উশাহ বন্ধ কৰি ৰখা।
লাহে লাহে ঠাণ্ডা পানী খোৱা বা বৰফৰ পানীৰে কুলকুুলি কৰা।
এচামুচ দানাযুক্ত চেনি খোৱা।
আঁঠু দুটা বুকুৰ ওচৰলৈ আনি আগলৈ হাউলি দিয়া।
কেতিয়া চিকিৎসকৰ কাষ চাপিব?
সাধাৰণতে হিকটি আপোনা-আপুনি ঠিক হৈ যায়, কিন্তু কিছুমান ক্ষেত্ৰত ই গুৰুতৰ ৰোগৰ লক্ষণ হ'ব পাৰে।
যদি হিকটি ৪৮ ঘণ্টা বা দুদিনতকৈ অধিক সময় ধৰি থাকে।
যদি হিকটিৰ সৈতে বুকুৰ বিষ, উশাহ ল'বলৈ কষ্ট হোৱা বা ওজন কমি যোৱাৰ দৰে সমস্যা দেখা দিয়ে।
কিডনীৰ সমস্যা, এচিড ৰিফ্লাক্স (GERD), বা স্নায়ুজনিত ৰোগৰ বাবেও দীৰ্ঘদিনীয়া হিকটি হ'ব পাৰে।
গতিকে, হিকটি যদি অস্বাভাৱিক ধৰণে বাৰে বাৰে আহি থাকে, তেন্তে ইয়াক অৱহেলা নকৰি বিশেষজ্ঞ চিকিৎসকৰ পৰামৰ্শ লোৱাটো অতি প্ৰয়োজনীয়।
Continue Reading
