আধাৰ কাৰ্ডৰ সৈতে ভোটাৰ পৰিচয় পত্ৰ সংযোগ কৰিলেনে? কেন্দ্ৰই বৃদ্ধি কৰিলে সময়সীমা, ঘৰতে কিদৰে কৰিব পাৰিব সংযোগ, জানো আহক

আধাৰ কাৰ্ড আৰু ভোটাৰ পৰিচয় পত্ৰ সংযোগ কৰাৰ মূল উদ্দেশ্য হৈছে একাধিক সমষ্টিত এজন ব্যক্তিৰে ভোটাৰ তালিকাত নাম পঞ্জীয়ন কৰাটো বন্ধ কৰা৷ এক কথাত ক’বলৈ গ’লে আধাৰ কাৰ্ড আৰু ভোটাৰ পৰিচয় পত্ৰ সংযোগ কৰাৰ পিছত এজন লোকে কেৱল এটা সমষ্টিতহে ভোটাৰ তালিকাত নিজৰ নাম অন্তৰ্ভুক্ত কৰিব পাৰিব৷ কেন্দ্ৰীয় চৰকাৰৰ এগৰাকী বিষয়াই প্ৰকাশ কৰা মতে ভোটাৰ পৰিচয় পত্ৰক আধাৰ কাৰ্ডৰ সৈতে সংযোগ কৰাৰ অন্তিম তাৰিখ ৩১ মাৰ্চ, ২০২৪ লৈ বৃদ্ধি কৰা হৈছে। ইয়াৰ পূৰ্বে, কেন্দ্ৰীয় চৰকাৰে ১ এপ্ৰিল, ২০২৩ ৰ ভিতৰত তেনে কৰাৰ বাবে সময়সীমা নিৰ্ধাৰণ কৰি দিছিল৷২০২১ চনৰ ডিচেম্বৰত লোকসভাই নিৰ্বাচনী আইন (সংশোধনী) বিধেয়ক গৃহীত কৰিছিল। আৰু তাৰ পিছতে ভোটাৰ আইডিৰ সৈতে আধাৰ সংযোগ কৰিবলৈ অনুমোদন জনোৱা হৈছিল।

 ঘৰতে কৰিব পৰা যায় ভোটাৰ আইডিৰ সৈতে আধাৰ সংযোগ৷  ইয়াৰ বাবে আপোনাক কেৱল এটা ইণ্টাৰনেট সংযোগ কৰিব পৰা  স্মাৰ্টফোনৰ প্ৰয়োজন হ’ব। এয়া  কিদৰে কৰিবজানো আহক-  

১. ফোনৰ ব্ৰাউজাৰৰ পৰা https://voterportal.eci.gov.in/ যাওঁক।

২. মোবাইল নম্বৰ / ইমেইল আইডি / ভোটাৰ আইডি নম্বৰ ব্যৱহাৰ কৰি লগইন কৰক আৰু পাছৱৰ্ড এটা দিয়ক৷

৩. নাম, জন্ম তাৰিখ আৰু পিতৃৰ নাম আদিৰ লগতে  ৰাজ্য, জিলা আৰু ব্যক্তিগত বিৱৰণ আদি যথাস্থানত পূৰণ কৰক।

৪. বিৱৰণবোৰ পূৰণ কৰাৰ পিছত, 'ছাৰ্চ'ত ক্লিক কৰক। যদি আপুনি প্ৰদান কৰা বিৱৰণবোৰ চৰকাৰী ডাটাবেছৰ সৈতে মিলে, তেন্তে সেয়া স্ক্ৰীণত প্ৰদৰ্শিত হ'ব।

৫. 'ফিড আধাৰ নং' ত ক্লিক কৰক। ইয়াক স্ক্ৰীণৰ বাওঁফালে দেখা যায়।

এটা পপ-আপ পৃষ্ঠা ওলাব। তাত আপুনি আধাৰ নম্বৰ, ভোটাৰ পৰিচয় পত্ৰ তথ্য , পঞ্জীভুক্ত ম'বাইল নম্বৰত উল্লেখ থকা  আপোনাৰ নাম দিব লাগিব।

৭. সকলো বিৱৰণ সঠিকভাৱে পূৰণ কৰাৰ পিছত তথ্যবোৰ এবাৰ পুনৰ পৰীক্ষা কৰি চাওঁক  কৰক। তাৰ পিছত 'ছাবমিট' বুটামত ক্লিক কৰক।

৮. স্ক্ৰীণত দেখুৱাব যে আপোনাৰ আবেদন  সফলতাৰে গ্ৰহণ কৰা হৈছে।