ডিজিটেল ডেস্কঃ ৰাজধানী দিল্লীৰ বিভিন্ন স্থানত এতিয়া ওলমিছে 'মোদী হাটাও, দেশ বচাও' পোষ্টাৰ। খোদ দিল্লীতে মোদীৰ বিৰুদ্ধে এনেদৰে ফোষ্টাৰ লগোৱাৰ কথাই ৰাজধানী চহৰ খনত বেছ আলোড়ণৰ সৃষ্টি কৰিছে৷দিল্লী আৰক্ষীয়ে ইতিমধ্যে পোষ্টাৰ লগোৱাৰ সন্দেহত ১০০ জন লোকৰ বিৰুদ্ধে এজাহাৰ পঞ্জীয়ন কৰিছে। অভিযুক্তসকলৰ ভিতৰৰে ছয়জনক ইতিমধ্যে গ্ৰেপ্তাৰো কৰা হৈছে। দিল্লী আৰক্ষীয়ে কমেও ২,০০০ পোষ্টাৰ জব্দ কৰিছে৷
দিল্লী আৰক্ষীৰ মতে, প্ৰধানমন্ত্ৰী আৰু মোদী চৰকাৰৰ বিৰোধিতা কৰি দিল্লীৰ বিভিন্ন অঞ্চলৰ দেৱাল আৰু লাইট পোষ্টত এনেধৰণৰ পোষ্টাৰ লগোৱা হৈছে। পোষ্টাৰসমূহৰ কিছুমানত "মোদী হাটাও, দেশ বচাও" বুলি লিখা হৈছে আৰু কিছুমানক কেন্দ্ৰৰ বিৰুদ্ধে শ্ল'গান লিখা হৈছে। দিল্লী আৰক্ষীৰ বিশেষ আয়ুক্ত দীপেন্দ্ৰ পাঠকে কয় যে আম আদমী পাৰ্টিৰ কাৰ্যালয়লৈ যোৱা এখন ভানৰ পৰা কমেও ২০০০ পোষ্টাৰ উদ্ধাৰ কৰা হৈছে। ভান চালকজনে দাবী কৰিছিল যে তেওঁক পোষ্টাৰবোৰ আপৰ কাৰ্যালয়লৈ নিবলৈ কোৱা হৈছিল।
ইয়াৰ পৰা আৰক্ষীয়ে অনুমান কৰিছে যে পোষ্টাৰসমূহ লগোৱাৰ আঁৰত কেজৰিৱাল চৰকাৰৰ হাত থাকিব পাৰে। অৱশ্যে কথাবোৰ এতিয়াও স্পষ্ট হোৱা নাই৷এতিয়ালৈকে দিল্লী আৰক্ষীয়ে ছয়জন লোকক গ্ৰেপ্তাৰ কৰিছে৷ পোষ্টাৰসমূহ ছপোৱা প্ৰিণ্টিং প্ৰেছৰ গৰাকীকো গ্ৰেপ্তাৰ কৰা হৈছে।
তেওঁ কৈছে যে তেওঁ 'মোদী হটাও, দেশ বচাও' বুলি লিখা ৫০,০০০ পোষ্টাৰৰ অৰ্ডাৰ পাইছিল।ইয়াৰ পূৰ্বে, ২০২১ চনত সমগ্ৰ দেশতে কৰোনা টিকাকৰণৰ সময়ত দিল্লীত কেইবাখনো মোদী বিৰোধী পোষ্টাৰ লগোৱা হৈছিল। সেই সময়ত ১৭ জন লোকৰ বিৰুদ্ধে এজাহাৰ দাখিল কৰা হৈছিল আৰু তেওঁলোকৰ মাজৰে ১৫ জন লোকক গ্ৰেপ্তাৰ কৰা হৈছিল।
Continue Reading
