ডিজিটেল ডেস্কঃ পঞ্জাৱ কংগ্ৰেছৰ প্ৰাক্তন অধ্যক্ষ নৱজোৎ সিং সিদ্ধুক দহ মাহৰ অন্তত শনিবাৰে পাটিয়ালাৰ কেন্দ্ৰীয় কাৰাগাৰৰ পৰা মুকলি কৰি দিয়া হয়। ১৯৮৮ চনৰ ‘ইচ্ছাকৃতভাৱে আঘাত কৰা’ এটা গোচৰত শাস্তি প্ৰদান কৰা হৈছিল সিদ্ধুক। ৫৯ বছৰীয়া কংগ্ৰেছ নেতা সিদ্ধুক এবছৰৰ কাৰাদণ্ড বিহা হৈছিল। বিগত বৰ্ষৰ ২০ মে’ত উচ্চতম ন্যায়ালয়ে তেওঁক এবছৰৰ কঠোৰ কাৰাদণ্ডৰ শাস্তি প্ৰদান কৰে। কাৰাদণ্ডৰ সময়সীমা আছিল এবছৰ। অৱশ্যে জে’লত কৰা ভাল আচৰণৰ বাবে দহ মাহৰ পাছতে মুকলি কৰি দিয়া হয় প্ৰাক্তন ক্ৰিকেটাৰ তথা ৰাজনীতিবিদ নৱজোৎ সিং সিদ্ধুক।
এই সময়ত জে’লৰ বাহিৰত তেওঁৰ সমৰ্থকৰ ভিৰ দেখা গ’ল। ঢোল-ঢাকৰ সৈতে তেওঁক আদৰণি জনোৱা হয়।
জে’লৰ পৰা ওলাই আহি নৱজোৎ সিং সিদ্ধুৱে কয় যে “বৰ্তমান গণতন্ত্ৰ বুলি একো নাই। পঞ্জাৱত ৰাষ্ট্ৰপতিৰ শাসন অনাৰ ষড়যন্ত্ৰত সংখ্যালঘু লোকক লক্ষ্য কৰি লোৱা হৈছে। পঞ্জাৱক দুৰ্বল কৰিবলৈ চেষ্টা কৰিলে নিজে দুৰ্বল হৈ পৰিব।”
ৰাজ্যৰ ৰাজনীতিত সক্ৰিয় হোৱাৰ ইংগিত দিছে সিদ্ধুৱে। তেওঁ কয় যে তেওঁ ৰাজনীতিত সক্ৰিয় হ’ব বিচাৰে। একে সময়তে সিদ্ধুৱে বিজেপিৰ বিৰুদ্ধে সৰৱ হৈ পৰে।
তেওঁ লগতে কয় “দেশৰ গণতন্ত্ৰ আজি শিকলিৰে বন্ধা।” ৰাহুল গান্ধীৰ সমৰ্থনত সিদ্ধুৱে লগতে কয়, ‘পাঞ্জাব এই দেশৰ সুৰক্ষা কবচ। কিন্তু দেশত চলি আছে একনায়কত্ববাদী শাসন। ইয়াক ৰোধ কৰিবলৈ ৰাহুলৰ নেতৃত্বত এক বিপ্লৱ আহিব।”
ইয়াৰ সমান্তৰালকৈ পঞ্জাৱৰ মুখ্যমন্ত্রী ভগৱন্ত মানকো কেৱল কাগজে-পত্ৰইহে মুখ্যমন্ত্রী হৈ আছে বুলি কয় নৱজোৎ সিং সিদ্ধুৱে।
ইতিমধ্যে খালিস্তানী নেতা অমৃতপল সিঙক লৈ উত্তাল হৈ পৰিছে পঞ্জাৱৰ ৰাজনীতি। এই সন্দৰ্ভত সিদ্ধুৱে কয় যে পঞ্জাৱত ৰাষ্ট্ৰপতিৰ শাসন জাপি দিয়াৰ প্ৰচেষ্টা অব্যাহত আছে। কংগ্ৰেছক উদ্দ্যেশি সিদ্ধুৱে কয়, “ৰাহুল, প্ৰিয়ংকা আৰু প্ৰতিগৰাকী কংগ্ৰেছ কৰ্মীৰ সৈতে কান্ধত কান্ধ মিলাই যুঁজ দিম।”
Continue Reading
