আইছিছৰ সমৰ্থকৰ সন্ধানত ৩ খন ৰাজ্যৰ ৬০ টা স্থানত তালাচী "নিয়া"ৰ

যোৱা বছৰ তামিলনাডুৰ কইম্বাটুৰ আৰু কৰ্ণাটকৰ মাংগালুৰুত হোৱা বিস্ফোৰণৰ তদন্তও সংস্থাটোৱে কৰি  আছে। কোয়েম্বাটুৰত হোৱা বিস্ফোৰণত জামেজা মুবিন নামৰ এজন সন্দেহযুক্ত সন্ত্ৰাসবাদী  নিহত হৈছিল। ২০১৯ চনত তদন্তকাৰী সংস্থাটোৱে  তেওঁক আইএছআইএছৰ সৈতে জড়িত থকাৰ সন্দেহত সোধা-পোছা কৰিছিল। তেওঁ এজন অভিযান্ত্ৰিক শাখাৰ স্নাতক আছিল। বিস্ফোৰণৰ পিছত তামিলনাডু আৰক্ষীয়ে  সন্ত্ৰাসবাদীজনৰ ঘৰৰ পৰা প্ৰায় ৭৫  কিলোগ্ৰাম বিস্ফোৰক সামগ্ৰী উদ্ধাৰ কৰিছিল। কইম্বাটুৰৰ কোট্টাই ইশ্বৰণ মন্দিৰৰ ওচৰত সংঘটিত বিস্ফোৰণৰ গোচৰটোত আন কেইবাজনো লোকৰ নাম সাঙোৰ খাই পৰিছিল।  কইম্বাটুৰৰ বিস্ফোৰণত গ্ৰেপ্তাৰ হোৱা সকলৰ এজনে জেৰাৰ সময়ত স্বীকাৰ কৰিছিল যে শ্ৰীলংকাত ইষ্টাৰৰ সময়ত সংঘটিত আক্ৰমণৰ সৈতে জড়িত আইছিছ সন্ত্ৰাসবাদী উক্ত বিস্ফোৰণত জড়িত আছিল। অভিযুক্ত ফিৰোজ ইছমাইলে জেৰাৰ সময়ত স্বীকাৰ কৰিছিল যে তেওঁ কেৰালাৰ কাৰাগাৰত থকাৰ সময়তে  আজহাৰুদ্দিন আৰু ৰছিদ আলী নামৰ দুজন সন্ত্ৰাসবাদীক  লগ পাইছিল।

ইফালে, যোৱা বছৰৰ নৱেম্বৰ মাহত  মাংগালুৰুত এখন চলন্ত অটোত বিস্ফোৰণ সংঘটিত হয়। ঘটনাটোত অটো চালক আৰু অটো খনত থকা  যাত্ৰী আঘাতপ্ৰাপ্ত হৈছিল। পিছত অনুসন্ধানত প্ৰকাশ পাইছিল যে অটো-ৰিক্সা বিস্ফোৰণৰ মূল অভিযুক্তজন আইছিছৰ সৈতে জড়িত আছিল।    দেশৰ তিনি খন ৰাজ্য কৰ্ণাটক, তামিলনাডু আৰু কেৰালাত আইছিছ সন্ত্ৰাসবাদীৰ অৱস্থিতিৰ বিভিন্ন প্ৰমাণ আৰক্ষীয়ে লাভ কৰাৰ পিছতে আজিৰ তালাচী অভিযান চলোৱা হয়৷ তালাচীৰ সময়ত কাৰোবাক গ্ৰেপ্তাৰ কৰা হৈছে নে নাই অথবা কিবা আপত্তিজনক সামগ্ৰী উদ্ধাৰ হৈছে নেকি সেয়া এতিয়াও জানিব পৰা হোৱা নাই৷