আজৱ ডাক্তৰৰ গজৱ কাহিনী; উলিয়াবলৈ গৈছিল ষ্টোন, উলিয়ালে কিডনী, তাৰ পাছত এই কৰুণ পৰিণতি

ডিজিটেল ডেস্ক : কিডনীৰ পাথৰ উলিয়াবলৈ চিকিৎসালয়ত ভৰ্তি হৈছিল ৰোগী। পিছে দায়িত্বহীন, বেপৰোৱা চিকিৎসকে যি কাণ্ড কৰিলে সেই কাণ্ডৰ কথা পোহৰলৈ অহাৰ পাছতে চাঞ্চল্যৰ সৃষ্টি হৈছে। অস্ত্ৰোপচাৰৰ সময়ত ৰোগীৰ কিডনীয়েই উলিয়াই পেলালে অভযুক্ত চিকিৎসকে। এই ঘটনাৰ চাৰি মাহৰ পাছতে ৰোগীজনৰ মৃত্যু হয়। ঘটনা সংঘটিত হৈছে গুজৰাটত। গুজৰাটৰ বালাছিনোৰৰ কেএমজি হাস্পতালে এই দায়িত্বহীন কাৰ্য সংঘটিত কৰিছিল। ২০১২চনত এই কাণ্ড সংঘটিত হয়। দুৰ্ভগীয়া ৰোগীজনে চাৰিমাহৰ ভিতৰতে সাবটি লয় মৃত্যুক। এতিয়া আদালতৰ এক নিৰ্দেশৰ পাছত পুনৰ এই ঘটনাই চৰ্চা লাভ কৰিছে।

এই ঘটনা সংঘটিত হোৱাৰ পাছতে ভুক্তভোগী লোকজনৰ আত্মীয়ই মহিসাগৰ জিলাৰ বালাছিনোৰৰ কেএমজি হাস্পতালৰ বিৰুদ্ধে কাষ চাপিছিল উপভোক্ত আয়োগৰ। গুজৰাটৰ উপভোক্তা বিবাদ নিবাৰণ আয়োগে ৰোগীৰ আত্মীয়ক ১১লাখ ২৩ হাজাৰ টকাৰ ক্ষতিপূৰণ দিবলৈ হাস্পতালখনক নিৰ্দেশ দিছে। আয়োগৰ ৰায় অনুসৰি প্ৰত্যক্ষ বা পৰোক্ষভাৱে চিকিৎসকৰ দায়িত্বহীনতাৰ বাবে হাস্পতালখনকে জগৰীয়া কৰা হৈছে। আয়োগে কেৱল এই গুৰুতৰ ভুলৰ বাবেই নহয়, কৰ্মচাৰীৰ দায়িত্বহীনতাৰ বাবেও হাস্পতালখনক জগৰীয়া কৰিছে আৰু ভুক্তভোগী লোকৰ আত্মীয়ক ২০১২চনৰ পৰা এতিয়ালৈ ৭.৫শতাংশ হাৰৰ সূদ সহিতে ক্ষতিপূৰণ দিয়াৰ নিৰ্দেশ দিছে। উল্লেখ্য যে, ভুক্তভোগী লোকজন নদিয়ালৰ বাসিন্দা দেবেন্দ ভাই ৰাৱল বুলি জানিব পৰা গৈছে। লোকজনে পেচাবৰ সমস্যাত ভুগি হাস্পতালত ভৰ্তি হৈছিল। তেওঁৰ কিডনীৰ পাথৰ উলিওৱাৰ বাবে কৰা অপাৰেচনত চিকিৎসকে কিডনীয়েই উলিয়াই পেলোৱাত তেওঁ ২০১২ চনৰ ৮ জানুৱাৰীত মৃত্যুক সাবটি ল’বলগীয়া হৈছিল।