ডিজিটেল ডেস্কঃ কিম জং উনে কান্দিছে! শেহতীয়াকৈ উত্তৰ কোৰিয়াৰ একনায়কৰ এটা ভিডিঅ’ ভাইৰেল হৈছে য’ত তেওঁক চকু পানী টুকি থকা দেখা গৈছে।
ভিডিঅ’ত দেখা গৈছে এখন ৰাজহুৱা সভাত হাজাৰ হাজাৰ মহিলা দৰ্শকৰ মাজত বহি থকা কিমৰ চকু দুটা বাৰে বাৰে টিপটিপিয়া হৈ আছে। ফুলি উঠা গাল দুটাৰ তললৈ চকুপানী বৈ আহিছে। যাতে কোনেও সেয়া নেদেখে, তাৰবাবে কিমে গালত হাত থৈ চকুপানীখিনি মচি দিয়ে। ৰুমালৰেও মচিছে। মুখখন তললৈ নমাই ৰুমালেৰে চকু মচিছে।
এই দৃশ্যৰ ভিডিঅ’ ভাইৰেল হৈ পৰিছে। কিন্তু কিমে কিয় কান্দিছে? কোৰিয়াৰ চেণ্ট্ৰেল টেলিভিছনৰ বাতৰি অনুসৰি উত্তৰ কোৰিয়াৰ মাতৃসকলে আহ্বান কৰা এখন বৈঠকৰ সময়ত এই ঘটনা সংঘটিত হয়। পিয়ংইয়াঙত অনুষ্ঠিত হোৱা বৈঠকখনৰ আহ্বান জনাইছে উত্তৰ কোৰিয়াৰ একনায়কত্ববাদীয়ে।
শেহতীয়াকৈ উত্তৰ কোৰিয়াৰ জন্মৰ হাৰ কম হৈছে। সেই সন্দৰ্ভত কিমে দেশৰ মাতৃসকলৰ সহায় বিচাৰিছিল। অধিক সন্তান জন্ম দিবলৈ অনুৰোধ জনোৱা বৈঠকত কিমে উত্তৰ কোৰিয়াৰ মাতৃসকলক কয়- ''দেশখনৰ জন্মৰ হাৰ বৃদ্ধিৰ স্বাৰ্থত আমাক মাতৃৰ সহায়ৰ প্ৰয়োজন। একে সময়তে মই এইটোও ক’ব বিচাৰো যে যিকোনো সমস্যাত পৰিলে মইও মোৰ মাকেই প্ৰথমে মনত পেলাওঁ।’’
প্ৰসংগক্ৰমে যোৱা বছৰৰ হিচাপ অনুসৰি উত্তৰ কোৰিয়াত জন্মৰ হাৰ ১.৮ শতাংশ হৈছেগৈ। উত্তৰ কোৰিয়াত এতিয়া মুঠ জনসংখ্যা ২৫ লাখ। এই দেশখন দীৰ্ঘদিন ধৰি খাদ্য সংকটত ভুগি আছে।
Continue Reading
