ৰাজপথ হ’লগৈ ৰণাংগন; ধৰ্মীয় সমদলৰ মাজতে কেনেকৈ ঘটিল এই অঘটন?

ডিজিটেল ডেস্ক : মধ্যপ্ৰদেশৰ ধৰ চহৰ মঙলবাৰে হঠাতে হৈ পৰিল অশান্ত। ইছলাম ধৰ্মৰ প্ৰৱৰ্তক হজৰত মহম্মদৰ জন্মদিনত পালন কৰা মিলাড-উল-নবীৰ উৎসৱমুখৰ পৰিৱেশত হঠাতে বিৰাজ কৰিলে অশান্তিয়ে। মিলাড-উল-নবী উপলক্ষে মঙলবাৰে ধৰ চহৰৰ ৰাজপথত সমদল উলিয়াইছিল ইছলামধৰ্মীসকলে। কিন্তু সেই সময়তে সংঘটিত হ’ল অঘটন।

সমদল যোৱাৰ অনুমতি নিদিয়া পথেৰে সমদলটো আগবাঢ়ি যোৱাত বাধা দিলে আৰক্ষীয়ে। তৰ্ক-বিতৰ্কৰ সূচনা হ’ল দুয়ো পক্ষৰ মাজত। আৰক্ষীয়ে সমদলকাৰীসকলক নিৰ্ধাৰিত পথেৰে যাবলৈ আহ্বান জনালে। কিন্তু অনুসৰি নিদিয়া পথটোৰেই আগবাঢ়ি যোৱাত আকোঁৰগোজ হৈ ৰ’ল সমদলকাৰীসকল। বাদ-বিবাদো তীব্ৰ হৈ পৰিল আৰক্ষী আৰু সমদলকাৰীসকলৰ মাজত। অৱশেষত আৰক্ষীয়ে লাঠীচালনা কৰিবলৈ বাধ্য হ’ল সমদলকাৰীৰ ওপৰত।

আৰু পঢ়কঃ এইবাৰ জালত পৰিল জেকলিন; গ্ৰেপ্তাৰৰ ভয়ত মুখ শুকাইছে সুন্দৰী অভিনেত্ৰীৰ!

এটা হুলস্থূলীয়া পৰিৱেশৰ সৃষ্টি হ’ল ধৰৰ ৰাজপথত। ইফালে-সিফালে পলাবলৈ ধৰিলে সমদলকাৰীসকল। ৰাজপথত পৰি যোৱা কেইবাজনো সমদলকাৰীক প্ৰহাৰ কৰিলে আৰক্ষীয়ে।হঠাতে হোৱা এই অঘটনত বিবুধিত পৰিল সাধাৰণ লোক। ইফালে ধৰৰ আৰক্ষী অধীক্ষকে জানিবলৈ দিয়ে যে একাংশ উপদ্ৰৱকাৰীয়ে অশান্তিৰ সৃষ্টি কৰিছিল। সেই লোকসকলক আঁতৰাই দিয়াৰ পাছত মিলাড-উল-নবীৰ সমদল কাৰ্যসূচীসমূহ কৰা হয়। ধৰৰ ৰাজপথৰ এই লাঠীচালনাৰ অশান্ত পৰিস্থিতি এতিয়া ভাইৰেল হৈ পৰিছে সামাজিক মাধ্যমত।