ডিজিটেল ডেস্ক: ৰাজস্থানত প্ৰতি পাঁচ বছৰৰ মূৰকত ক্ষমতা পৰিৱৰ্তনৰ পৰম্পৰা অব্যাহত থাকিল৷ যদিও অশোক গেহলটে দাবী কৰিছিল যে তেওঁ এই পৰম্পৰা ভংগ কৰিব, কিন্তু আজিৰ ফলাফলৰ পাছত বিষণ্ণবদনে ৰাজ্যপাল কলৰাজ মিশ্ৰৰ ওচৰত পদত্যাগ পত্ৰ দাখিল কৰে গেহলটে৷
এই নিৰ্বাচনত ৰাজস্থানৰ কেইবাগৰাকীও প্ৰবীণ নেতাই পৰাজয়ৰ সন্মুখীন হ’বলগা হ’ল৷ অশোক গেহলট চৰকাৰৰ বাৰগৰাকীৰো অধিক কেবিনেট মন্ত্ৰীয়ে এই নিৰ্বাচনত পৰাজয় বৰণ কৰিলে৷
এই নিৰ্বাচনত ৰাজস্থানত কংগ্ৰেছৰ আটাইতকৈ ধনী প্ৰাৰ্থী আছিল ৰফিক মাণ্ডেলিয়া৷ ধনৰ জোৰেও জয়ী কৰাব নোৱাৰিলে মাণ্ডেলিয়াক৷ তেওঁ কংগ্ৰেছৰ হৈ চুৰু বিধানসভা আসনৰ পৰা প্ৰতিদ্বন্দ্বিতা কৰিছিল।
তেওঁ দাখিল কৰা শপতনামা অনুসৰি ৰফিক মাণ্ডেলিয়াৰ ১৬৬ কোটি টকাৰ অধিক সম্পত্তি আছে। তেওঁ একেৰাহে চতুৰ্থবাৰৰ বাবে নিৰ্বাচনী ৰণত অৱতীৰ্ণ হৈছিল৷ তেওঁ ২০০৯ আৰু ২০১৯ চনত লোকসভা নিৰ্বাচনতো প্ৰতিদ্বন্দ্বিতা কৰিছিল। কিন্তু এইবাৰো ৰফিকে পৰাজয়ৰ সন্মুখীন হ’বলগীয়া হ’ল।
ৰফিকে এই বিধানসভা নিৰ্বাচনত হৰলাল চাহাৰনৰ বিৰুদ্ধে পৰাজয়ৰ সন্মুখীন হ’বলগীয়া হয়৷ হৰলালে ৰফিকক ৬৮৭৪ টা ভোটত পৰাজিত কৰে৷ হৰলালে ৯৯৪৩২ টা ভোট লাভ কৰিছিল আৰু ৰফিকে লাভ কৰিছিল ৯২৫৫৮ টা ভোট। বিগত বিধানসভা নিৰ্বাচনত ৰফিকে ৰাজেন্দ্ৰ ৰাঠৌৰৰ হাতত পৰাজয়ৰ সন্মুখীন হ’বলগা হৈছিল।
ৰাজস্থানত কংগ্ৰেছে ১৯৯জনীয়া বিধানসভাত ৬৯খন আসন লাভ কৰিছে৷ আনহাতে বিজেপিয়ে ১১৫খন আসন লাভ কৰিছে।
ৰাজস্থানৰ লগতে কংগ্ৰেছে মধ্য প্ৰদেশ আৰু ছত্তীশগড়তো পৰাজয়ৰ সন্মুখীন হৈছে। তিনিওখন ৰাজ্যতে বিজেপিয়ে নিৰংকুশ সংখ্যাগৰিষ্ঠতা লাভ কৰিছে। অৱশ্যে, কংগ্ৰেছৰ বাবে সকাহৰ খবৰটো হ’ল যে প্ৰথমবাৰৰ বাবে দলটোৱে তেলেংগানাত চৰকাৰ গঠন কৰাৰ দিশে আগবাঢ়িছে, য’ত কংগ্ৰেছে সংখ্যাগৰিষ্ঠতা লাভ কৰিছে।
Continue Reading
