আকৌ গুলী চলিল আদালতত, এইবাৰ অধিবক্তাক গুলীয়াই হত্যা; আঁৰত কোন?

ডিজিটেল ডেস্ক : আদালত গুচি যেন এতিয়া হৈছে ৰণক্ষেত্ৰহে! কিছুদিন পূৰ্বে দিল্লীৰ ৰোহিণী আদালতৰ গেংৱাৰৰ ঘটনাই সৃষ্টি কৰিছিল তীব্ৰ চাঞ্চল্যৰ। আদালতৰ মজিয়াতে প্ৰতিদ্বন্দ্বী গেংষ্টাৰে গুলীয়াই হত্যা কৰিছিল কাৰাবন্দী গেংষ্টাৰ জিতেন্দ্ৰ গোগীক। ইয়াৰ সৈতে সাঙোৰ খাইছিল আন এজন কাৰাবন্দী গেংষ্টাৰ তিল্লু তাজপুৰীয়াৰ নাম। কাৰাগাৰৰ ভিতৰৰ পৰাই তিল্লু তাজপুৰীয়াই এই গেংৱাৰ নিয়ন্ত্ৰণ কৰিছিল বুলি চৰ্চা চলিছিল। এইবাৰ পুনৰ সংঘটিত হৈছে অনুৰূপ ঘটনা।

এইবাৰ আদালতৰ ভিতৰতে গুলীয়াই হত্যা কৰা হ’ল অধিবক্তাক। এই ঘটনা সংঘটিত হৈছে উত্তৰপ্ৰদেশৰ শ্বাহজাহানপুৰৰ এখন জিলা আদালতৰ ভিতৰত। নিহত হোৱা লোকজন ভূপেন্দৰ সিং বুলি জানিব পৰা গৈছে। আদালত ভৱনত তৃতীয় মহলাত তেওঁৰ মৃতদেহ উদ্ধাৰ হয়। তেওঁৰ মৃতদেহৰ কাষত এটা দেশীয়ভাৱে নিৰ্মিত পিষ্টলো উদ্ধাৰ হৈছে। প্ৰাথমিক প্ৰতিবেদনত প্ৰকাশ পাইছে যে, এই ঘটনা ঘটাৰ সময়ত লোকজন অকলশৰে আছিল। তেওঁৰ আশে-পাশে কোনো লোক নাছিল।

কোনে কি কাৰণে তেওঁক হত্যা কৰিলে সেয়া এতিয়াও পোহৰলৈ অহা নাই। ফৰেনচিক বিশেষজ্ঞই ইতিমধ্যে সমগ্ৰ ঘটনাৰ তদন্ত কৰি আছে। শ্বাহজাহানপুৰৰ আৰক্ষী অধীক্ষককে ধৰি শীৰ্ষ পৰ্যায়ৰ আৰক্ষীৰ লোকসকল ঘটনাস্থলীত উপস্থিত হৈছে আৰু ঘটনাৰ তদন্ত কৰি আছে। পূৰ্বে বেংকত চাকৰি কৰা ভূপেন্দৰ সিঙে চাৰি পাঁচ বছৰ মানৰপৰা ওকালতি কৰি আছিল। তেওঁৰ হত্যাৰ আঁৰত কোনো অপৰাধিক চক্ৰৰ হাত থকাৰ সন্দেহ কৰা হৈছে।