আকৌ মাধমাৰ! পুনৰ বৃদ্ধি পালে পেট্ৰ’ল-ডিজেলৰ মূল্য

ডিজিটেল ডেস্কঃ বিগত কেইবামাহো ধৰি ইন্ধনৰ মূল্যই মাধমাৰ শোধাই আহিছে সাধাৰণ ৰাইজক। সোমবাৰ অৰ্থাৎ আজিও বৃদ্ধি পাইছে পেট্ৰ’ল-ডিজেলৰ মূল্য। আজি পেট্ৰ’ল প্ৰতিলিটাৰত ৩০ পইছা আৰু ডিজেল প্ৰতিলিটাৰত ৩৫ পইছাকৈ বৃদ্ধি পাইছে। দিল্লীত প্ৰতিলিটাৰ পেট্ৰ’লত ১০৪.৪৪ টকা আৰু ডিজেলত ৯৩.১৮ টকা, মুম্বাইত প্ৰতিলিটাৰ পেট্ৰ’লত ১১০.৪১ টকা আৰু ডিজেলত ১০১.০৩ টকা।

উল্লেখ্য যে, দেশৰ কেইবাখনো ৰাজ্যত ইতিমধ্যে পেট্ৰলৰ দাম ১০০ টকাতকৈ অধিক হৈছে। অসমতো ১০০ৰ ঘৰ চুলে পেট্ৰ’লৰ মূল্যই।দেশৰ ২৬ খন ৰাজ্যত পেট্ৰ’ল প্ৰতি লিটাৰত ১০০ টকাত উপনীত হৈছে। উত্তৰ প্ৰদেশ, মধ্য প্ৰদেশ, ছত্তীশগড়, দিল্লী, জম্মু আৰু কাশ্মীৰ, অন্ধ্ৰ প্ৰদেশ, বিহাৰ, মহাৰাষ্ট্ৰ, কৰ্ণাটক, মণিপুৰ, নাগালেণ্ড, পণ্ডিচেৰী, তেলেংগানা, পঞ্জাৱ, ছিকিম, উৰিষ্যা, কেৰালা, তামিলনাডু, পশ্চিম বংগ, ত্ৰিপুৰা, ঝাৰখণ্ড, গোৱা, অসম, গুজৰাট, হাৰিয়ানা, হিমাচল, উত্তৰাখণ্ড আৰু ৰাজস্থানত পেট্ৰ’লৰ মূল্যই ১০০ অতিক্ৰম কৰিলে।

ডিজেলৰ ক্ষেত্ৰত মধ্য প্ৰদেশ, ছত্তীশগড়, অন্ধ্ৰ প্ৰদেশ, উৰিষ্যা, তেলেংগানা, বিহাৰ, গুজৰাট, মহাৰাষ্ট্ৰ আৰু ৰাজস্থানৰ বহু ঠাইত প্ৰতি লিটাৰত ১০০ৰ ঘৰ অতিক্ৰম কৰিছে।