ডিজিটেল ডেস্কঃ পাকিস্তানী সন্ত্ৰাসবাদীয়ে পুনৰ অৰাজকতাৰ সৃষ্টি কৰিছে কাশ্মীৰত ৷ নতুন বছৰৰ আৰম্ভনিতে উপত্যকাটো আকৌ এবাৰ অস্থিৰ হৈ পৰিছে। দেওবাৰে নিশা সন্ত্ৰাসবাদীয়ে জম্মুৰ ৰাজৌৰী অঞ্চলৰ পৰা ১০ কিলোমিটাৰ দক্ষিণে ধানগৰী গাঁৱত আক্ৰমণ কৰে।
সন্ত্ৰাসবাদীৰ গুলীচালনাৰ ফলত চাৰিজন লোক নিহত হয়। এই ঘটনাত ৯ জন লোক গুৰুতৰভাৱে আহত হয়৷ স্থানীয় সূত্ৰ অনুসৰি, সন্ত্ৰাসবাদীয়ে দেওবাৰে এখন এছইউভিত আহি ধানগ্ৰী গাঁৱত আক্ৰমণ কৰে। তেওঁলোকে গাড়ীৰ পৰা নামি গুলী চালনা কৰিবলৈ ধৰে । স্থানীয় লোকে আহতসকলক ৰাজৌৰীৰ চৰকাৰী চিকিৎসালয়লৈ লৈ যায়।
চিকিৎসালয়ত তিনিজন লোকক মৃত ঘোষণা কৰা হয় । মাজনিশা আন এজন ব্যক্তিৰ মৃত্যু হয়। মৃতসকলক সতীশ কুমাৰ (৪৫), দীপক কুমাৰ (২৩) আৰু প্ৰীতম লাল (৫৭) বুলি চিনাক্ত কৰা হৈছে। চিকিৎসালয়ত মাজনিশা মৃত্যু হোৱা ব্যক্তিজনৰ পৰিচয় এতিয়াও জানিব পৰা হোৱা নাই।
আহতসকলৰ শৰীৰত একাধিক গুলীৰ আঘাত লাগিছে। গুৰুতৰভাৱে আহত সকলক পিছত জম্মু চহৰৰ এখন চিকিৎসালয়ত ভৰ্তি কৰোৱা হয়। আৰক্ষীৰ সূত্ৰ অনুসৰি সন্ত্ৰাসবাদীয়ে অঞ্চলটোত বাস কৰা হিন্দু বাসিন্দাসকলক আক্ৰমণৰ লক্ষ্য কৰি লৈছিল৷ দুজন সন্ত্ৰাসবাদীয়ে অঞ্চলটোৰ তিনিটা ঘৰত আক্ৰমণ কৰিছিল।
Continue Reading
