ডিজিটেল ডেস্কঃ ২২ জানুৱাৰীত মুকলি হ’ব অযোধ্যাৰ ৰাম মন্দিৰ । মন্দিৰত স্থাপিত ৰাম লালাক সুৰক্ষা দিব 'ব্লেক কেট'-এ। উত্তৰ প্ৰদেশ আৰক্ষীৰ দ্বাৰা নিৰ্বাচিত ২০০ জন বিষয়া আৰু জোৱানক অযোধ্যাৰ ৰাম মন্দিৰত পহৰা দিয়া এই বিশেষ বাহিনীৰ বাবে বাছনি কৰা হৈছে। তেওঁলোকক এনএছজি-এ প্ৰশিক্ষণ দিছে । যদি সকলো ঠিকে থাকে তেন্তে বিশেষ বাহিনীয়ে ২২ জানুৱাৰীত মন্দিৰ উদ্বোধনৰ পূৰ্বেই দায়িত্ব গ্ৰহণ কৰিব।
যোগী আদিত্যনাথ চৰকাৰৰ উদ্যোগত এই বিশেষ বাহিনী গঠন কৰা হৈছে। হাৰিয়ানাৰ মানেচাৰত এনএচি কমাণ্ডোসকলে বাহিনীটোক প্ৰশিক্ষণ দিছে। ২০০ জন বিষয়া আৰু জোৱানৰ এই বাহিনীয়ে ৰাম মন্দিৰত যিকোনো ধৰণৰ বিশৃংখল পৰিস্থিতি, আনকি সন্ত্ৰাসবাদীৰ আক্ৰমণৰো প্ৰতিৰোধ কৰিব পাৰিব। সৈনিকসকলে পৰিস্থিতি অনুসৰি কঠোৰ ব্যৱস্থা গ্ৰহণ কৰিব পাৰিব। এনএছজিয়ে সাধাৰণতে ভিভিআইপি আদিৰ সুৰক্ষাৰ সৈতে সম্পৰ্কিত। উত্তৰ প্ৰদেশ আৰক্ষীৰ এই বাহিনীটোকো এনএছজিয়ে একেধৰণৰ প্ৰশিক্ষণেই দিছে। জানিব পৰা মতে এই বাহিনীৰ জোৱানসকলৰ পোছাক 'ব্লেক কেট' কমাণ্ডোৰ শৈলীত প্ৰস্তুত কৰা হৈছে।
গুজৰাটৰ অক্ষৰধাম মন্দিৰত অতীততে আক্ৰমণ কৰা হৈছিল। অযোধ্যাতো সন্ত্ৰাসবাদী আক্ৰমণ সংঘটিত হৈছে। এই কথা মনত ৰাখি কঠিন পৰিস্থিতিৰ মোকাবিলা কৰিবলৈ এই বাহিনীৰ আৰক্ষী কৰ্মীসকলক বিশেষ প্ৰশিক্ষণ দিয়া হৈছে। এগৰাকী শীৰ্ষ আৰক্ষী বিষয়াই কয় "আমি আমাৰ বিষয়া আৰু জোৱানসকলৰ ওপৰত বিশ্বাসী। তেওঁলোকক ৰাম মন্দিৰত আক্ৰমণ প্ৰতিহত কৰিব পৰাকৈ বিশেষ প্ৰশিক্ষণ দিয়া হৈছে"।
Continue Reading
