ডিজিটেল ডেস্কঃ ৰাজস্থানত বাস কৰা এহাল পুৰুষ-মহিলাই ৩৩ বছৰ পূৰ্বে সংকল্প লৈছিল যে অযোধ্যাত ৰাম মন্দিৰ নিৰ্মাণ হ’লেহে বিয়া পাতিব। এতিয়া এই দম্পতীৰ সংকল্প পূৰণ হৈছে। অযোধ্যাত ৰাম মন্দিৰ নিৰ্মাণ হ’ল আৰু এতিয়া চৌদিশে গুঞ্জৰিত হৈছে জয় শ্ৰী ৰাম ধ্বনি। ৰাম মন্দিৰ নিৰ্মাণ হোৱাৰ পাছত তেওঁলোকৰ সংকল্প পূৰণ হ’ল আৰু শেহতীয়াকৈ দুয়ো ইজনে সিজনক বৰমালা পিন্ধাই বিবাহপাশত আৱদ্ধ হয়।
আপোনালোকক জনাওঁ যে ৰাজস্থানৰ জয়পুৰৰ বাসিন্দা ডাঃ মহেন্দ্ৰ ভাৰতীয়ে ১৯৯০ চনতে বিবাহ উপযুক্ত হৈছিল। সেই সময়তে ৰাম মন্দিৰৰ কৰ সেৱকৰ ওপৰত হোৱা গুলীচালনাৰ ঘটনাত তেওঁ ইমানেই বিচলিত হৈছিল যে তেওঁ তেতিয়াই সিদ্ধান্ত লৈছিল যেতিয়ালৈকে অযোধ্যাত ৰাম মন্দিৰ নিৰ্মাণ নহয় তেতিয়ালৈকে তেওঁ বিয়া নাপাতে।
এতিয়া ৰাম মন্দিৰত ৰামলালা বিৰাজমান হোৱাৰ পাছতেই আজমেৰৰ বাসিন্দা ডাঃ শালিনী গৌতমৰ সৈতে ডা° মহেন্দ্ৰ ভাৰতী বিবাহপাশত আবদ্ধ হয়। ৩৩ বছৰীয়া সংকল্প সম্পূৰ্ণ কৰি বিবাহপাশত আবদ্ধ হয় এই দম্পতী। অযোধ্যাৰ ৰাম মন্দিৰ দৰ্শন কৰাৰ পাছতেই হোমৰ জুইক সাক্ষী কৰি চিৰজীৱনলৈ এক হয় ডাঃ মহেন্দ্ৰ ভাৰতী আৰু ডাঃ শালিনী গৌতম।
ডা° মহেন্দ্ৰ ভাৰতীয়ে কয় যে ''মই অতি সুখী, অতি আপ্লুত। এই মুহূৰ্তটো মোৰ জীৱনৰ সৌভাগ্য হিচাপে আহিছে। ১৯৯০ চনত মই সংকল্প লৈছিলোঁ যে ভগৱান শ্ৰীৰামৰ মন্দিৰ নিৰ্মাণ হ’লেহে মই বিয়া পাতিম। সেই ইচ্ছা পূৰণ হৈছে। প্ৰভু ৰামে সকলোৰে কুশল-মংগল কৰক।''
Continue Reading
