ডিজিটেল ডেস্কঃ চলিত বৰ্ষৰ প্ৰথম ছমাহতে অভিলেখ সংখ্যক আমাজন বৰ্ষাৰণ্য মুকলি কৰাৰ খবৰ ওলাইছে। এই কথা প্ৰকাশ কৰিছে ব্ৰাজিলৰ মহাকাশ সংস্থা ইনপেই। উপগ্ৰহৰ ছবিত ধৰা পৰিছে সমগ্ৰ দৃশ্যপট। নিউয়ৰ্ক চহৰৰ যিমান আয়তন তাতোকৈ পাঁচগুণ এলেকাত গছবোৰ কাটি মুক্ত কৰা হৈছে আমাজন বৰ্ষাৰণ্য।
ব্ৰাজিল চৰকাৰে সদৰী কৰা অনুসৰি, ‘২০১৬ চনৰ পাছত ইমান পৰিমাণৰ বনাঞ্চল কটা হোৱা নাছিল।’ ইফালে আমাজন বৰ্ষাৰণ্যৰ শেহতীয়া পৰিস্থিতিক লৈ চিন্তিত হৈ পৰিছে পৰিৱেশবিদসকল।
উপগ্ৰহৰ চিত্ৰ অনুসৰি, চলিত বৰ্ষৰ জানুৱাৰীৰ পৰা জুন মাহৰ ভিতৰত আমাজন বৰ্ষাৰণ্যত ৩,৯৮৮ বৰ্গ কিলোমিটাৰ গছ কটা হৈছে। যোৱা বছৰৰ প্ৰথম ছমাহতকৈ চলিত বৰ্ষত ১০.৮ শতাংশ অধিক গছ কটা হৈছে। ২০২১ চনৰ প্ৰথম ছমাহত ৩,০৮৮ বৰ্গ কিলোমিটাৰ এলেকাৰ গছ কাটি পেলোৱা হৈছিল। কেৱল জুন মাহতেই ১,১২০ বৰ্গ কিলোমিটাৰ গছ কটা হৈছিল বুলি প্ৰকাস পাইছে। বিশ্বৰ সৰ্ববৃহৎ বৰ্ষাৰণ্য আমাজন কয়লাৰ বাবে চহকী। এই হাবিত থকা গছবোৰ কাটি খনিটোৰ পৰা সেই কয়লা উলিয়াবলৈকে ততপৰ হৈ পৰিছে সংশ্লিষ্ট কৰ্তৃপক্ষ, নিৰন্তৰ চলি গৈছে বনভূমি ধ্বংসৰ যজ্ঞলীলা। এইদৰে ব্যাপক দাৰত বনভূমি ধ্বংসৰ ফলশ্ৰুতিত বৃদ্ধি পাইছে গোলকীয় উষ্ণতা। সলনি হৈছে জলবায়ু।
প্ৰাপ্ত পৰিসংখ্যাই অনুসৰি, বিগত পাঁচ দশকত আমাজন অঞ্চলৰ ১৭ শতাংশ অঞ্চলত গছ-গছনি কাটি মুকলি কৰা হৈছে। খেতি আৰু পশুপালনৰ বাবে বনাঞ্চল কটা হৈছে বুলিও তথ্য প্ৰকাশ পাইছে। ব্ৰাজিলৰ ৰাষ্ট্ৰপতি জেইৰ বলছ’নাৰোৱে আমাজন বনাঞ্চলত বনভূমি ধ্বংস ৰোধৰ বাবে সক্ৰিয় পদক্ষেপ গ্ৰহণ কৰা নাই বুলিও অভিযোগ পৰিৱেশবিদ সকলৰ।
Continue Reading
