ডিজিটেল ডেস্ক: আকৌ প্ৰদেশ কংগ্ৰেছত বিসম্বাদৰ উকমুকনি৷ বিজেপিৰ আগ্ৰাসী ৰাজনীতিত দিশহাৰা হৈ পৰিছে অসম প্ৰদেশ কংগ্ৰেছ কমিটীৰ একাংশ নেতা৷
প্ৰদেশ কংগ্ৰেছৰ ভয়ানক ধুমুহাৰ উমান দি একাংশ নেতা সাজু হৈছে সভাপতি ভূপেন বৰাৰ হাতত সমুহীয়াকৈ পদত্যাগ পত্ৰ দিবলৈ। আনকি, এখোপ ওপৰলৈ গৈ সভাপতি ভূপেন বৰা কাৰ লগত আছে সেয়া স্পষ্ট কৰিবলৈ সকীয়াই দিছে দলটোৰ কাৰ্যকৰী সভাপতি ৰাণা গোস্বামীয়ে।
যোৰহাটৰ প্ৰাক্তন বিধায়ক তথা কংগ্ৰেছৰ জ্যেষ্ঠ নেতা ৰাণা গোস্বামীয়ে এইবাৰ গুৰি ধৰিছে বিসম্বাদৰ৷ বিজেপিৰে কংগ্ৰেছৰ নেতা-বিধায়কৰ গোপন সম্পৰ্কৰ বিস্ফোৰক অভিযোগ উত্থাপন কৰিছে ৰাণা গোস্বামীয়ে৷ আজি নগাঁৱত সাংবাদিকৰ সন্মুখত বিস্ফোৰণ ঘটাই গোস্বামীয়ে কয়, কংগ্ৰেছত দুই তাল মৰা নেতা নালাগে৷ কোনো বিধায়ক দলবিৰোধী কাৰ্যকলাপত জড়িত হ’লে দলে ব্যৱস্থা লওক৷
‘অমৃত কলহ’ত বিধায়কৰ অংশগ্ৰহণক লৈ দলীয় সমৰ্থক অসন্তুষ্ট বুলি উল্লেখ কৰি ৰাণা গোস্বামীয়ে কয়, ৰাহুল গান্ধীৰ ওপৰত মোৰ বিশ্বাস আছে৷ ১১ অক্টোবৰত দলৰ ৰাজনৈতিক পৰিক্ৰমা বিভাগৰ সভা আছে৷ তাতে বিষয়টো উত্থাপন কৰিম শীৰ্ষ নেতৃত্বৰ আগত৷
মূলতঃ অমৃত কলহে অন্তঃকলহ সৃষ্টি কৰিছে কংগ্ৰেছত৷ তিতাবৰৰ বিধায়ক ভাস্কৰ বৰুৱাই বিজেপিৰ অমৃত কলহ কাৰ্যসূচীত ভাগ লোৱাৰ পাছতেই ৰাণা গোস্বামীয়ে আজি নেতৃত্বৰ বিৰুদ্ধে মুকলিকৈ ক্ষোভ উজৰা পৰিলক্ষিত হয়৷
ইপিনে, কংগ্ৰেছৰ দলীয় বিষয়ত সৰব হৈছে সুযোগ সন্ধানী এআইইউডিএফ৷ আনহাতে, ৰাণা গোস্বামীয়ে কেন্দ্ৰীয় নেতৃত্বলৈ অভিযোগ পত্ৰ প্ৰেৰণ কৰাৰ পাছতেই ভূপেন বৰাক শীৰ্ষ নেতৃত্বই মাতি পঠাইছে দিল্লীলৈ।
এতিয়া প্ৰশ্ন হয়, হঠাৎ কিয় দলীয় নেতৃত্বৰ বিৰুদ্ধে বিদ্ৰোহ ঘোষণা কৰিলে ৰাণা গোস্বামীয়ে? যিসময়ত ৰাজ্যত প্ৰতিষ্ঠানবিৰোধী ঢৌ সৰ্বাত্মক ৰূপত গঢ় লৈ উঠিছে, যিসময়ত বিজেপি মিত্ৰজোঁটৰ অংশীদাৰী দল অগপৰ একাংশ নেতা কংগ্ৰেছলৈ অহাৰ যো-জা চলাইছে, সেইসময়ত কংগ্ৰেছৰ একাংশ নেতাৰ এনে স্থিতি ৰহস্যজনক হিচাপে বিবেচিত হৈছে৷ চৰ্চালৈ আহিছে ভাস্কৰ বৰুৱা, ৰেকিবুদ্দিন আহমেদৰ স্থিতিও৷
Continue Reading
