ডিজিটেল ডেস্কঃ আন্তঃৰাষ্ট্ৰীয় ক্ৰিকেট এৰি এতিয়া খেলুৱৈসকলে বিভিন্ন দেশৰ টি-২০ লীগত খেলিবলৈ অধিক আগ্ৰহী নেকি? এলেক্স হেলছৰ অৱসৰ লোৱাৰ সিদ্ধান্তই এই প্ৰশ্নটো আকৌ এবাৰ উত্থাপন কৰিছে। ইংলেণ্ডৰ হোৱাইট বল অ’পেনাৰগৰাকীয়ে শুকুৰবাৰে অৱসৰৰ কথা ঘোষণা কৰে। ৩৪ বছৰ বয়সত তেওঁৰ এই সিদ্ধান্তই ক্ৰিকেট প্ৰেমীক আচৰিত কৰি তুলিছে।
টি-২০ বিশ্বকাপবিজয়ী হেলেছে শেষবাৰৰ বাবে যোৱা বছৰৰ নৱেম্বৰ মাহত ইংলেণ্ডৰ হৈ খেলিছিল। আন্তঃৰাষ্ট্ৰীয় ক্ৰিকেটৰ পৰা বিদায় লৈ হেলেছে কয়- ''দেশৰ হৈ ১৫৬খন মেচ খেলাৰ সুযোগ পাইছিলোঁ। মোৰ বাবে গৌৰৱৰ বিষয়। আজীৱন মোৰ লগত থাকিব পৰা বন্ধু কেইজনমান পাইছো। মই ভাবো এইটোৱেই অৱসৰৰ সৰ্বোত্তম সময়।”
ইংলেণ্ডৰ জাৰ্চি পিন্ধি হেলছৰ শেষ মেচ আছিল যোৱা বছৰৰ টি-২০ বিশ্বকাপৰ ফাইনেল। হেলেছে কয়, ‘ইংলেণ্ডৰ জাৰ্চিত যিমানেই সফলতা লাভ কৰিছো, সিমানেই মোৰ বহুত বেয়া সময়ো পাৰ হৈছে। এটা কথা মই মনত ৰাখিম যে ইংলেণ্ডৰ হৈ মোৰ শেষ মেচ আছিল বিশ্বকাপৰ ফাইনেল। আমি সেইটো জিকিলোঁ।"
হেলছে আই পি এলত মুম্বাই ইণ্ডিয়ানছৰ হৈ খেলিছিল। কলকাতা নাইট ৰাইডাৰ্ছ দলত বাছি লোৱা হৈছিল যদিও পিছত মানসিক সমস্যাৰ বাবে নাম প্ৰত্যাহাৰ কৰে। ইয়াৰ উপৰিও হেলছক বিভিন্ন দেশৰ টি-২০ লীগত খেলা দেখা যায়।
ইংলেণ্ডৰ হৈ হেলছে ১১ খন টেষ্টত ৫৭৩ ৰাণ, ৭০ খন এদিনীয়াত ২,৪১৯ ৰাণ আৰু ৭৫খন টি-২০ মেচত ২,০৭৪ ৰাণ সংগ্ৰহ কৰিছে।
Continue Reading
