আনুবংশিক বিকাৰ; এক অবাঞ্চিত পৰিস্থিতিৰে যুঁজিছে পাকিস্তানৰ এইসকল লোকে

ডিজিটেল ডেস্ক: এক বৰ্ধিত সমস্যাই গ্ৰাস কৰিছে পাকিস্তানক৷ সেয়া হৈছে আনুবংশিক বিকাৰ৷ সম্পৰ্কীয় ভাই-ভনীৰ মাজত বিবাহৰ প্ৰথা পাকিস্তানৰ এটা জনজাতিৰ পৰম্পৰাগত নিয়ম৷ কিন্তু এই প্ৰথাই পাকিস্তানত কেইবা দশক ধৰি শিশুসকলৰ স্বাস্থ্যজনিত সমস্যাৰ সৃষ্টি কৰি আহিছে। সমস্যাটো কেৱল এখন দেশ হিচাপে পাকিস্তানতে সীমাবদ্ধ নহয়, কিন্তু ই সমগ্ৰ বিশ্বৰ পাকিস্তানীসকলৰ মাজত এক চিন্তাৰ বিষয় হৈ পৰিছে। শেহতীয়া প্ৰতিবেদনত প্ৰকাশ পোৱা মতে, পাকিস্তানে সম্পৰ্কীয় ভাই-ভগ্নীৰ সৈতে বিবাহ সম্পন্ন কৰাৰ বাবে কেনেদৰে সৰ্বাধিক হাৰত চিকিৎসা প্ৰত্যাহ্বানৰ সন্মুখীন হৈছে। পাকিস্তানত, অন্তঃপ্ৰজননৰ ফলত শিশুৰ মাজত আনুবংশিক বিকাৰৰ সংখ্যা অস্বাভাৱিকভাৱে অধিক হয়। পৰিণামৰ বিষয়ে অৱগত হোৱা সত্ত্বেও দেশৰ বহুতো সম্প্ৰদায়ত সম্পৰ্কীয় বিবাহ এতিয়াও এক নিয়ম। তাৰে এক উদাহৰণ হিচাপে দাঙি ধৰিব পাৰি পাকিস্তানৰ এজন ব্যক্তিৰ ক্ষেত্ৰত৷ পাকিস্তানৰ এজন ৫৬ বছৰীয়া ব্যক্তি৷ তেওঁৰ নাম হৈছে গফুৰ হুছেইন শ্বাহ৷ শিক্ষকতা কৰা গফুৰ হুছেইনৰ আছে আঠটাকৈ সন্তান। পাকিস্তান অধিকৃত কাশ্মীৰৰ বাসিন্দা শ্বাহে ১৯৮৭ চনত তেওঁৰ সম্পৰ্কীয়ৰ সৈতে বিবাহপাশত আবদ্ধ হৈছিল। তেওঁৰ আঠটা শিশুৰ ভিতৰত, তিনিজন দিব্যাংগ বুলি জানিব পৰা গৈছে। তেওঁৰ পুত্ৰৰ এজনৰ মগজু স্বাভাৱিক আকাৰলৈ বিকশিত হ’ব নোৱাৰিলে। তেওঁৰ এজনী কন্যাৰ শ্ৰৱণশক্তিৰ সমস্যা আছে, আনহাতে আন এজনী কথা ক’বলৈ অক্ষম। অন্তঃপ্ৰজননৰ ফলত কি হ’ব পাৰে সেই বিষয়ে অৱগত হোৱা সত্ত্বেও পাকিস্তানৰ জনজাতীয় ৰীতি-নীতি অনুসৰি, শ্বাহে এই বিবাহ কৰাবলৈ বাধ্য হৈছিল৷ তেওঁ কয়, ‘মোৰ আটাইতকৈ ডাঙৰ দুখ হৈছে যে তেওঁলোকে শিক্ষা লাভ কৰিব নোৱাৰিলে। মই সদায় তেওঁলোকৰ বিষয়ে চিন্তিত... মোৰ পত্নী আৰু মই যোৱাৰ পাছত কোনে তেওঁলোকৰ চোৱাচিতা কৰিব?’ তেওঁ এনেদৰে কয়। আনুবংশিক বিকাৰৰ বিপদাশংকা থকা সত্ত্বেও শ্বাহে কৈছিল যে সম্পৰ্কীয় ভাই-ভনীসকলক বিয়া কৰিবলৈ আহ্বান জনোৱা ৰীতি-নীতি মানি চলিবলৈ যথেষ্ট সামাজিক চাপ প্ৰয়োগ কৰা হয়। যিকোনো ব্যক্তিয়ে তেওঁলোকৰ সন্তানক পৰিয়ালৰ ভিতৰত বিবাহৰ বাবে আগবঢ়াবলৈ অস্বীকাৰ কৰিলে সমাজৰ পৰা বহিষ্কাৰ হোৱাৰ আশংকাও থাকে। শ্বাহে কৈছিল যে তেওঁৰ এজন পুত্ৰ আৰু দুগৰাকী কন্যাক নিকট আত্মীয়ৰ সৈতে বিয়া দিব লাগিব। তেওঁৰ পৰিয়ালৰ চিকিৎসা ইতিহাসত অন্তৰ্ভুক্ত আছে তেজৰ বিকাৰ, শিকাৰ অক্ষমতা, অন্ধ আৰু বধিৰতাৰ। আনহাতে চিকিৎসকৰ মতে, অন্তঃপ্ৰজননেই হৈছে ইয়াৰ মূল কাৰণ৷ পাকিস্তানত কিয় সম্পৰ্কীয় বিবাহৰ প্ৰচলন হয়? কৰাচীস্থিত স্বাস্থ্য বিশেষজ্ঞ চেৰাজ উদৌল্লাই কৈছিল যে, পাকিস্তানত সম্পৰ্কীয় বিবাহৰ প্ৰথা ইছলামী ধৰ্মীয় মতবাদৰ পৰা পোৱা যায়। 'মই ধৰ্মগুৰুসকলক আনুবংশিক ৰোগৰ বিষয়ে সজাগতা সৃষ্টি কৰাত সহায় কৰিবলৈ কৈছিলো, তেওঁলোকক লোকসকলক বুজাবলৈ চেষ্টা কৰিছিল যে, কেনেদৰে সম্পৰ্কীয় বিবাহে আনুবংশিক ৰোগ বৃদ্ধিত অৰিহণা যোগাইছে।’অৱশ্যে, তেওঁ কৈছিল যে তেওঁ যিসকল মৌলবীৰ সৈতে কথা পাতিছিল তেওঁলোকে স্পষ্টভাৱে অস্বীকাৰ কৰিছিল, তেওঁ দাবী কৰিছিল যে এনে বিবাহ ইছলামিক ছৰিয়া আইন আৰু পয়গম্বৰ মহম্মদৰ পৰম্পৰা অনুসৰিহে সম্পন্ন হয়।