ডিজিটেল ডেস্ক: কৰ্ণাটকৰ হিজাব বিতৰ্ক সন্দৰ্ভত মুখ খুলিছে শান্তিৰ নোবেলজয়ী মালালা ইউছুফজাইয়ে৷ কৰ্ণাটকৰ হিজাব পৰিহিতা মুস্কানৰ পক্ষত থিয় হৈ মালালাই কয়, ভাৰতীয় নেতাসকলে মুছলমান মহিলাক পৰিসীমিতকৰণ বন্ধ কৰিব লাগিব৷ ভাৰতীয় নেতাসকলক মুছলমান মহিলাসকলৰ ওপৰত সীমিতকৰণ বন্ধ কৰিবলৈ আহ্বান জনাই নোবেল বঁটা বিজয়ী তথা মহিলা অধিকাৰ কৰ্মী মালালা ইউছুফজাইয়ে কৰ্ণাটকত হিজাব পৰিহিতা ছাত্ৰীসকলক শ্ৰেণীত উপস্থিত থাকিবলৈ অনুমতি নিদিয়াৰ শেহতীয়া ঘটনা সন্দৰ্ভত উদ্বেগ প্ৰকাশ কৰে৷
এটা টুইটত মালালাই লিখিছে এনেদৰে, ছোৱালীবোৰক তেওঁলোকৰ হিজাব পিন্ধি বিদ্যালয়লৈ যাবলৈ দিবলৈ অস্বীকাৰ কৰাতো ভয়ংকৰ৷ কৰ্ণাটকৰ মুখ্যমন্ত্ৰী বাসবৰাজ বোম্মাই মঙলবাৰে শান্তি আৰু সম্প্ৰীতি বজাই ৰখাৰ বাবে উচ্চ বিদ্যালয় আৰু মহাবিদ্যালয়সমূহ তিনিদিনৰ বাবে বন্ধ ৰখাৰ কথা ঘোষণা কৰিছিল।
কৰ্ণাটকৰ উদুপী জিলাৰ চৰকাৰী মহাবিদ্যালয়ে শিক্ষাৰ্থীসকলক শ্ৰেণীকোঠাৰ ভিতৰত হিজাব পিন্ধিবলৈ নিষিদ্ধ কৰাৰ পাছত সংঘৰ্ষ আৰম্ভ হৈছিল৷ নিষেধাজ্ঞা প্ৰতিৰোধ কৰা সাতজন শিক্ষাৰ্থীক প্ৰৱেশৰ পৰা বঞ্চিত কৰা হৈছিল। তেতিয়াৰে পৰা ৰাজ্যখনত প্ৰতিবাদ বিয়পি পৰিছে৷ কিছুমান হিন্দু শিক্ষাৰ্থী আৰু হিন্দুত্ববাদী সংগঠনে গেৰুৱা বস্ত্ৰ পৰিধান কৰি তেওঁলোকৰ নিজা প্ৰতিবাদী আন্দোলন আৰম্ভ কৰিছে।
ইফালে, ৰাজ্যিক শিক্ষা প্ৰতিষ্ঠানসমূহে মুছলমান ছাত্ৰীসকলক হিজাব পিন্ধিবলৈ নিষিদ্ধ কৰা সিদ্ধান্তক বৈধতা প্ৰদান কৰি কৰ্ণাটক চৰকাৰে যোৱা সপ্তাহত কৈছিল যে, সমতা, সততা আৰু ৰাজহুৱা আইন-শৃংখলা বিঘ্নিত কৰা কাপোৰ পিন্ধিব নালাগে৷
