ৰাষ্ট্ৰপতি নিৰ্বাচন: ফাৰুক আব্দুল্লা, গোপালকৃষ্ণ গান্ধীৰ পিছত এইবাৰ মমতাৰ পচন্দ প্ৰাক্তন কেন্দ্ৰীয় মন্ত্ৰী যশৱন্ত সিনহা

ইয়াৰ পূৰ্বে মমতাই এনচিপিৰ মুৰব্বী শাৰদ পাৱাৰ, নেচনেল কনফাৰেন্সৰ নেতা ফাৰুক আব্দুল্লা আৰু পশ্চিম বংগৰ প্ৰাক্তন ৰাজ্যপাল গোপাল কৃষ্ণ গান্ধীৰ নাম প্ৰস্তাৱ কৰিছিল৷ কিন্তু তেওঁলোকৰ মাজৰে সকলোৱে মমতাৰ  অনুৰোধ  অস্বীকাৰ কৰিছিল। এনে পৰিস্থিতিত মমতাই যশৱন্ত সিনহাক বিৰোধীৰ উমৈহতীয়া প্ৰাৰ্থী হিচাবে প্ৰক্ষেপ কৰাৰ কথা চিন্তা কৰিছে বুলি তৃণমূলৰ সূত্ৰই প্ৰকাশ কৰিছে৷ 

সূত্ৰটোৱে কয় ’যশৱন্ত সিনহা এতিয়া  টিএমচিৰ নেতা। গতিকে বহুতে  প্ৰস্তাৱটো কেৱল  আমাৰ ফালৰ পৰা যোৱা বুলি ভাবিব পাৰে। কিন্তু এতিয়ালৈকে তিনিৰ পৰা চাৰিটা দলে যশৱন্ত সিনহাক বিৰোধীৰ উমৈহতীয়া প্ৰাৰ্থী হিচাবে ঘোষণা কৰাত  সন্মতি হৈছে’।  মঙলবাৰে বিজেপি নেতৃত্বাধীন এন ডি এৰ বিৰুদ্ধে যুটীয়া প্ৰাৰ্থী প্ৰদানৰ ক্ষেত্ৰত সহমত গঢ়ি তুলিবলৈ নতুন দিল্লীত এন চি পিৰ মুৰব্বী শৰদ পাৱাৰে আহ্বান কৰা মুখ্য বিৰোধী দলসমূহৰ এখন বৈঠকত সিনহাৰ নাম আলোচনা কৰা হ'ব বুলিও সূত্ৰটোৱে কয়৷ কাইলৈ টিএমচিৰ ৰাষ্ট্ৰীয় সাধাৰণ সম্পাদক তথা সাংসদ অভিষেক বেনাৰ্জীয়ে নতুন দিল্লীত হ’বলগীয়া বৈঠকত অংশগ্ৰহণ কৰিব৷ মমতা বেনাৰ্জীয়েও যোৱা সপ্তাহত নতুন দিল্লীত ২২ টা অ-বিজেপি দলৰ এনে বৈঠক আহ্বান কৰিছিল। 

১৭ টা বিৰোধী দলৰ নেতা  উক্ত বৈঠকত উপস্থিত  আছিল। বেনাৰ্জীৰ পচন্দ  সিনহাই দুবাৰ কেন্দ্ৰীয় বিত্ত মন্ত্ৰী হিচাপে কাৰ্যনিৰ্বাহ কৰিছিল - এবাৰ ১৯৯০ চনত চন্দ্ৰ শেখৰ মন্ত্ৰীসভাত আৰু তাৰ পিছত পুনৰ বাজপেয়ী মন্ত্ৰীসভাত। তেওঁ বাজপেয়ী মন্ত্ৰীসভাত বৈদেশিক পৰিক্ৰমা মন্ত্ৰালয়ৰ দপ্তৰৰ দায়িত্ব বহন কৰিছিল। নতুন ৰাষ্ট্ৰপতি নিৰ্বাচিত কৰাৰ প্ৰক্ৰিয়া ১৫ জুনত আৰম্ভ হৈছে। মনোনয়ন দাখিলৰ অন্তিম তাৰিখ হৈছে ২৯ জুন।ভোটগ্ৰহণ ১৮ জুলাইত আৰু ২১ জুলাইত গণনা অনুষ্ঠিত হ'ব।ইপিনে কাইলৈ শাৰদ পাৱাৰে আহ্বান জনোৱা বৈঠকত উপস্থিত নাথাকে মমতা বেনাৰ্জী। শাৰদ পাৱাৰে আগৰ বিৰোধীৰ বৈঠক খনক গুৰুত্ব নিদিয়াৰ বাবেই মমতাই পাৱাৰে আহ্বান জনোৱা বৈঠকত উপস্থিত নাথাকে বুলি ধাৰণা কৰা হৈছে৷

আগন্তুক ৰাষ্ট্ৰপতি নিৰ্বাচনৰ বাবে ৰণনীতি প্ৰস্তুত কৰিবলৈ ১৫ জুনত দিল্লীত বেনাৰ্জীয়ে আহ্বান কৰা এনে ধৰণৰ প্ৰথম খন বৈঠকত সিদ্ধান্ত লোৱা হৈছিল যে এজন উমৈহতীয়া প্ৰাৰ্থী, যি "দেশৰ গণতান্ত্ৰিক নীতি বজাই ৰাখিব", তেওঁক বিৰোধী মনোনীত ব্যক্তি হিচাপে বাছনি কৰা হ'ব।

 সভাখনত প্ৰায় ১৭ টা দল উপস্থিত আছিল। কংগ্ৰেছ, সমাজবাদী পাৰ্টি, এনচিপি, ডিএমকে, আৰজেডি আৰু বাওঁপন্থী দলসমূহৰ নেতাসকলে তৃণমূল কংগ্ৰেছৰ সৰ্বোচ্চ নেতাই আহ্বান কৰা দুঘণ্টাধৰি চলি থকা বৈঠকত অংশগ্ৰহণ কৰে, আনহাতে আপ, এছএডি, এআইএমআইএম, তেলেংগানা ৰাষ্ট্ৰ সমিতি আৰু উৰিষ্যাৰ শাসনাধিষ্ঠ বিজেডিয়ে বৈঠকত উপস্থিত নাছিল। শিৱসেনা, চিপিআই, চিপিআই(এম), চিপিআই(এমএল), নেচনেল কনফাৰেন্স, পিডিপি, জেডি(এছ), আৰএছপি, আইইউএমএল, আৰএলডি আৰু জেএমএমৰ নেতাসকল উপস্থিত আছিল।