ডিজিটেল ডেস্ক: কাছাৰৰ বদৰপুৰঘাটৰ দেৱেন্দ্ৰনগৰস্থিত বিভিচিএল হেল্থ চেণ্টাৰত লায়ন্স বৰ্ষ ২০২৬ - ২৭ৰ চতুৰ্থটো চকু পৰীক্ষা শিবিৰ অনুষ্ঠিত হয়। লায়ন্স ক্লাব অৱ বদৰপুৰ গ্ৰেটাৰ, শিলচৰ লায়ন্স আই হস্পিটেল আৰু ভেলী ষ্ট্ৰং চিমেণ্টৰ যৌথ উদ্যোগত আয়োজিত এই শিবিৰত মুঠ ৬২ জন লোকৰ চকু পৰীক্ষা কৰা হয়।
পৰীক্ষাত ১০ জন লোকৰ চকুত ছানি ধৰা পৰে। তেওঁলোকক উন্নত চিকিৎসা আৰু ছানি অস্ত্ৰোপচাৰৰ বাবে শিলচৰ লায়ন্স আই হস্পিটেললৈ প্ৰেৰণ কৰা হয়। ইয়াৰ উপৰি, প্ৰয়োজনীয় ৩৩ জন লোকৰ মাজত বিনামূলীয়াকৈ চশমা বিতৰণ কৰা হয়।
সাধাৰণ ৰাইজৰ বাবে সহজলভ্য চকু চিকিৎসা সেৱা আগবঢ়োৱা আৰু চকুৰ সমস্যাসমূহ আগতীয়াকৈ চিনাক্ত কৰাই আছিল এই শিবিৰৰ মূল উদ্দেশ্য। ভৱিষ্যতেও সাধাৰণ ৰাইজৰ বাবে এনেধৰণৰ স্বাস্থ্য আৰু চকু চিকিৎসা সেৱা অব্যাহত থাকিব বুলি জানিবলৈ দিয়ে ভেলী ষ্ট্ৰং চিমেণ্টৰ চিইঅ’ তথা ক্লাবৰ আইপিপি মুকেশ আগৰৱালে।
এইদিনাৰ শিবিৰত উপস্থিত থাকে সভাপতি ডাঃ স্বপন কুমাৰ দাস, জ্যেষ্ঠ লায়ন্স বিষয়া প্ৰদীপ্ত কুমাৰ দে, সুজিত কৰ, সমৰজিৎ চক্ৰৱৰ্তী, শমীন্দ্ৰ পাল, স্বেচ্ছাসেৱী অধিবক্তা লক্ষ্মী দত্তগুপ্তৰ লগতে লায়ন্স আই হস্পিটেল আৰু ভেলী ষ্ট্ৰং চিমেণ্টৰ বিষয়ববীয়াসকল।
Continue Reading
