আৰক্ষীৰ তীব্ৰ অভিযানত হাটশিঙিমাৰীত গ্ৰেপ্তাৰ ১১ জনকৈ চোৰাং গৰু সৰবৰাহকাৰী

ডিজিটেল ডেস্ক: হাটশিঙিমাৰী জিলাৰ সুখচৰ আৰক্ষীয়ে চোৰাং গৰু সৰবৰাহকাৰীৰ বিৰুদ্ধে তীব্ৰ অভিযান অব্যাহত ৰাখিছে। বিগত কেইদিনমানৰ পৰা অঞ্চলটোত সক্ৰিয় হৈ উঠা চোৰাং গৰু সৰবৰাহৰ চক্ৰটোৰ বিৰুদ্ধে আৰক্ষীয়ে কঠোৰ অৱস্থান গ্ৰহণ কৰি একেৰাহে অভিযান চলাই যোৱা পৰিলক্ষিত হৈছে।

লাভ কৰা তথ্য অনুসৰি, সুখচৰ আৰক্ষীয়ে চলোৱা এই ধাৰাবাহিক অভিযানত মাত্ৰ দুটা দিনৰ ভিতৰতে মুঠ ১১ জনকৈ কুখ্যাত চোৰাং গৰু সৰবৰাহকাৰীক গ্ৰেপ্তাৰ কৰিবলৈ সক্ষম হৈছে। সুখচৰ অঞ্চলৰ বিভিন্ন স্থান আৰু সম্ভাৱ্য ঘাটিত এই অভিযান চলাই সৰবৰাহকাৰী কেইজনক এক প্ৰকাৰ জালেৰে ঘেৰি ধৰে আৰক্ষীয়ে।

ইফালে, এই অভিযানৰ অংশ হিচাপে আজি সুখচৰ আৰক্ষীয়ে পুনৰ অভিযান চলাই আন দুজন চোৰাং গৰু সৰবৰাহকাৰীক হাতেলোটে গ্ৰেপ্তাৰ কৰিবলৈ সক্ষম হয়। ধৃত লোক দুজন ক্ৰমে সুখচৰ থানা এলেকাৰ অন্তৰ্গত ছফিউৰ ৰহমান মণ্ডল আৰু মিনাৰুল মণ্ডল বুলি চিনাক্ত কৰা হৈছে।

বৰ্তমান সুখচৰ আৰক্ষী থানাত গ্ৰেপ্তাৰ হোৱা এই চোৰাং গৰু সৰবৰাহকাৰীসকলক তীক্ষ্ণ জেৰা অব্যাহত ৰখা হৈছে। আৰক্ষীৰ প্ৰাৰম্ভিক জেৰাত এই সৰবৰাহ চক্ৰটোৰ লগত আৰু কোন কোন ব্যক্তি বা বৃহৎ নেটৱৰ্ক জড়িত হৈ আছে, সেই বিষয়ে গুৰুত্বপূৰ্ণ তথ্য পোহৰলৈ অহাৰ সম্ভাৱনা আছে। আৰক্ষীৰ এই কঠোৰ পদক্ষেপত অঞ্চলটোৰ সাধাৰণ ৰাইজে স্বস্তিৰ নিঃশ্বাস পেলাইছে।