ডিজিটেল ডেস্ক: কামৰূপ জিলাৰ ক্ষেত্ৰীৰ নোৱাগাঁৱত ২৭ নম্বৰ ৰাষ্ট্ৰীয় ঘাইপথত আজি এক অতি ভয়ংকৰ তথা শোকাৱহ পথ দুৰ্ঘটনা সংঘটিত হয়। এই মৰ্মান্তিক দুৰ্ঘটনাত এগৰাকী মহিলাসহ থিতাতে তিনিজন লোকৰ কৰুণ মৃত্যু হয় আৰু আন তিনিগৰাকী যাত্ৰী গুৰুতৰভাৱে আহত হয়।
প্ৰাপ্ত তথ্য অনুসৰি, মহানগৰীৰ দিশৰ পৰা নগাঁও অভিমুখে তীব্ৰ বেগেৰে গৈ থকা এটা পৰিয়ালৰ 'হোণ্ডাই আই-টেন' (Hyundai i10, পঞ্জীয়ন নম্বৰ: AS 01 DX 5663) বাহনখনে নিয়ন্ত্ৰণ হেৰুৱাই পথৰ কাষৰ সুৰক্ষা ৰেলিঙত প্ৰচণ্ড জোৰে খুন্দা মাৰে। তীব্ৰ বেগৰ বাবেই চালকে বাহনখন নিয়ন্ত্ৰণ কৰিব নোৱাৰি এই দুৰ্ঘটনাটো সংঘটিত কৰা বুলি প্ৰাথমিকভাৱে অনুমান কৰা হৈছে।
দুৰ্ঘটনাটোৰ পিছতে স্থানীয় ৰাইজ আৰু ক্ষেত্ৰী আৰক্ষীৰ তৎপৰতাত তাৎক্ষণিকভাৱে উদ্ধাৰ অভিযান চলোৱা হয়। সংকটজনক অৱস্থাত আহত তিনিগৰাকী যাত্ৰীক ততাতৈয়াকৈ চিকিৎসালয়লৈ প্ৰেৰণ কৰা হয়। এই শোকাৱহ ঘটনাই সমগ্ৰ অঞ্চলটোত গভীৰ শোকৰ ছাঁ পেলাইছে।
Continue Reading
