ডিজিটেল ডেস্কঃ কাটাৰ বিশ্বকাপৰ সামৰণি মঞ্চত উদ্দাম নৃত্য প্ৰদৰ্শন কৰিলে নোৰা ফাটেহিয়ে। সমগ্ৰ বিশ্ব মুগ্ধ হৈ পৰিল বলিউডৰ আইটেম গাৰ্লগৰাকীৰ নাচোনৰ তালত। ভাৰতৰ জাতীয় পতাকা লৈও তেওঁ বিশ্বকাপত নৃত্য প্ৰদৰ্শন কৰে। বিশ্বকাপৰ মঞ্চত ভাৰতৰ পতাকা উৰাটো অনেকে গৌৰৱৰ মুহূৰ্ত বুলি অভিহিত কৰিছে।
বিশ্বকাপত নৃত্য প্ৰদৰ্শন কৰাৰ পাছতে ইনষ্টাগ্ৰামযোগে নোৰাই এটা আৱেগিক প’ষ্ট শ্বেয়াৰ কৰিছে। তাত তেওঁ নিজৰ সংগ্ৰামৰ বিষয়ে অনুৰাগীসকলৰ আগত ব্যক্ত কৰিছে। এয়া তেওঁৰ কেৰিয়াৰৰ 'মহাকাব্যিক মুহূৰ্ত’ বুলি অভিহিত কৰিছে নোৰাই।
নোৰাই বলিউডত সফলতা লাভ কৰিলেও তেওঁৰ জন্ম কানাডাৰ এটা মৰক্কান পৰিয়ালত। ১৯৯২ চনত জন্মগ্ৰহণ কৰা নোৰাই নিজকে 'হৃদয়ৰ পৰা ভাৰতীয়’ বুলি অভিহিত কৰি আহিছে।
সৰুৰে পৰাই নৃত্যকলাৰ প্ৰতি আগ্ৰহী আছিল নোৰা। কিন্তু পৰিয়ালৰ পৰা কোনো সহযোগ লাভ কৰা নাছিল। স্কুলতো নাচ-গানৰ কোনো পৰিৱেশ নাছিল। কিন্তু তাৰ পাছতো বিভিন্ন মঞ্চত নৃত্য প্ৰদৰ্শন কৰি যায় নোৰাই।
১৬ বছৰ বয়সৰ পৰা নোৰাই জীৱন জীৱিকাৰ সংগ্ৰামত জড়িত হৈ পৰে। ৰেষ্টুৰেণ্টৰ ৱেইটাৰৰ পৰা বাৰগাৰ্ললৈকে সকলো বৃত্তিত সোমাই পৰে নোৰা।
কলেজ শেষ নকৰাকৈয়েই তেওঁ বলিউডলৈ আহে। নৃত্যকলাত থকা দক্ষতাৰ বাবে বলিউড আৰু দক্ষিণ ভাৰতৰ কেইবাখনো চিনেমাৰ আইটেম চঙত সুযোগ পাই নোৰাই। ২০১৪ চনত 'ৰোৰঃ দ্যা টাইগাৰ্ছ অৱ সুন্দৰবন্ছ’ নামৰ ছৱিখনত তেওঁ প্ৰথমবাৰৰ বাবে অভিনয় কৰে।
২০১৮ চনত মুক্তি লাভ কৰে 'সত্যমেৱ জয়তে’ ছৱিখনে মুক্তিলাব কৰে। তাত 'দিলবৰ’ গানটোত উদ্দাম নৃত্য প্ৰদৰ্শন কৰে নোৰাই। সুস্মিতা সেনে নৃত্য কৰা নবৈ দশকৰ গানটো নোৰাৰ নাচোনত নতুন ৰূপ লাভ কৰে। 'দিলবৰ’ৰ জৰিয়তে তাৰকাৰ শাৰীলৈ যায় নোৰা ফাটেহি।
'দিলবৰ’ৰ পাছতে বলিউডৰ নতুন আইটেম গাৰ্ল হিচাপে পৰিচিত হৈ পৰে নোৰা। কেইবাধৰণৰো নৃত্যশৈলীত দক্ষতা থকা নোৰাই আন্তৰ্জাতিক খ্যাতিও লাভ কৰে। শেহতীয়াকৈ কেইবাটাও বিতৰ্কতো সাঙোৰ খাই পৰিছে নোৰা।
পৰিয়ালৰ অমান্তি সত্বেও নৃত্যৰ জগতত প্ৰৱেশৰ পৰা বলিউডৰ তাৰকা হোৱালৈকে, বাৰগাৰ্ল-ৱেইটাৰৰ বৃত্তিৰ পৰা ফিফা বিশ্বকাপত নৃত্য প্ৰদৰ্শনলৈকে নোৰা ফাটেহিৰ এই যাত্ৰা নিঃসন্দেহে সংগ্ৰামৰ মাজেৰে পাৰ হৈ আহিছে।
Continue Reading
