ডিজিটেল ডেস্কঃ নদী বান্ধ কিমান ভয়াৱহ হ’ব পাৰে তাৰ শেহতীয়া প্ৰমাণ পোৱা গ’ল লিবিয়াত। উত্তৰ-পূব লিবিয়াত ধাৰাসাৰ বৰষুণৰ ফলত দুটাকৈ বান্ধ খহি পৰাৰ ফলত বৃহৎ অঞ্চল প্লাবিত হৈ পৰিছে। লিবিয়াত হঠাতে অহা বানত ডেৰনা আৰু দেশখনৰ পূবৰ অন্যান্য অংশত হাজাৰ হাজাৰ লোকৰ মৃত্যু ঘটিছে। লিবিয়াৰ চৰকাৰৰ অভ্যন্তৰীণ মন্ত্ৰালয়ৰ মতে এই ঘটনাত কমেও ৫,৩০০ জন লোকে প্ৰাণ হেৰুৱাইছে।
মৃতকৰ সংখ্যা আৰু বৃদ্ধি হ'ব পাৰে বুলি চৰকাৰী সূত্ৰই প্ৰকাশ কৰিছে। প্ৰায় ১০,০০০ লোক এতিয়াও সন্ধানহীন হৈ থকাৰ খবৰ পোৱা গৈছে। ষ্টৰ্ম ডেনিয়েল নামৰ ধুমুহাৰ বাবেই দেশ খনত ধাৰাসাৰ বৰষুণ হৈছে। বৰষুণৰ ফলতে বান্ধ দুটা হঠাতে খহি পৰে। বান্ধৰ তলৰ অংশত বাস কৰা এলেকাসমূহ নিমিষৰ ভিতৰতে সাগৰত পৰিণত হয়।
উল্লেখ্য ধুমুহা দানিয়েলে গ্ৰীচতো বিধ্বংসী ৰূপ ধাৰণ কৰিছিল। ফলত দেশ খনত বানপানী হৈছে। ইজিপ্তৰ প্ৰব্ৰজন মন্ত্ৰালয়ে বুধবাৰে কয় যে লিবিয়াত মৃত্যু হোৱা ৮৭ জন ইজিপ্তৰ লোকৰ মৃতদেহ উদ্ধাৰ কৰা হৈছে। মন্ত্ৰালয়ে লগতে কয় যে মৃতদেহবোৰ ইজিপ্তৰ সামৰিক বাহিনীয়ে স্বদেশলৈ প্ৰত্যাৱৰ্তন কৰিছিল চেষ্টা চলাই আছে।।
লিবিয়াৰ স্বাস্থ্য মন্ত্ৰী ওথমান আব্দুলজালিলে প্ৰকাশ কৰিছে যে গুৰুতৰভাৱে ক্ষতিগ্ৰস্ত পূব চহৰ ডেৰনাত সন্ধানহীন লোকৰ সংখ্যা ৬,০০০ হৈছে। তেওঁ পৰিস্থিতিটোক "প্ৰলয়ংকৰী" বুলি অভিহিত কৰে। দেশ খনত এতিয়া যুদ্ধকালীন তৎপৰতাৰে উদ্ধাৰ অভিযান চলাই আছে। নিহতৰ সংখ্যাই ১০,০০০ ঘৰ অতিক্ৰম কৰিব বুলি আশংকা কৰা হৈছে।
Continue Reading
