ডিজিটেল ডেস্ক: অন্ত পৰা নাই বাংলাদেশৰ হিন্দু নিৰ্যাতনৰ ঘটনা৷ বিভিন্ন মহলে বাংলাদেশৰ পৰিস্থিতিক লৈ প্ৰতিক্ৰিয়া প্ৰকাশ কৰি আহিছে৷ মঙলবাৰে আমেৰিকাৰ কংগ্ৰেছৰ সদস্য ব্ৰেড শ্বাৰমানে এই সন্দৰ্ভত নিজৰ প্ৰতিক্ৰিয়া প্ৰকাশ কৰি কয় যে, হিন্দু সংখ্যালঘুক সুৰক্ষা প্ৰদান কৰাৰ লগতে শেহতীয়াকৈ হোৱা আক্ৰমণ আৰু নিৰ্যাতনৰ বিৰুদ্ধে হাজাৰ হাজাৰ সংখ্যালঘু হিন্দুৰ প্ৰতিবাদৰ প্ৰতি সঁহাৰি জনাই ব্যৱস্থা গ্ৰহণ কৰাটো বাংলাদেশৰ অন্তৱৰ্তীকালীন চৰকাৰৰ দায়িত্ব বুলি উল্লেখ কৰে৷
শ্বেখ হাছিনাৰ চৰকাৰ উফৰাই দিয়াৰ পিছত বাংলাদেশত হিন্দুসকলৰ ওপৰত হোৱা হিংসাৰ বিষয়ে এতিয়া সমগ্ৰ বিশ্বতে চৰ্চাৰ বিষয় হৈ পৰিছে ।
আমেৰিকাৰ কংগ্ৰেছৰ সদস্যগৰাকীয়ে বাংলাদেশৰ প্ৰাক্তন প্ৰধানমন্ত্ৰী শ্বেখ হাছিনাৰ চৰকাৰ পতনৰ পূৰ্বে আৰু পিছত হোৱা হিংসাত্মক কাৰ্যকলাপৰ বাবে সংঘটিত হোৱা হত্যাকাণ্ড আৰু অন্যান্য অধিকাৰ উলংঘাৰ বাবে বাংলাদেশৰ হিন্দু বৌদ্ধ খ্ৰীষ্টান ঐক্য পৰিষদ আৰু ৰাষ্ট্ৰসংঘৰ মানৱ অধিকাৰ উচ্চায়ুক্ত ভলকাৰ তুৰ্কক তদন্ত কৰাৰ দাবী জনোৱাৰ লগতে প্ৰশাসনে হিন্দু সম্প্ৰদায়ৰ বিৰুদ্ধে হিংসাৰ অন্ত পেলোৱাৰ ক্ষেত্ৰত গুৰুত্বপূৰ্ণ ভূমিকা পালন কৰিব লাগে৷
উল্লেখযোগ্য যে বাংলাদেশৰ পৰা অহা হিন্দুসকলে হোৱাইট হাউছত এক সমদল উলিয়াই হিন্দু পুৰোহিত চিন্ময় কৃষ্ণ দাসৰ মুক্তি আৰু বাংলাদেশৰ হিন্দুসকলৰ সুৰক্ষাৰ দাবী জনায়। হিন্দু একচনৰ কাৰ্যবাহী সঞ্চালক উৎসৱ চক্ৰৱৰ্তীয়ে বাইডেন-হেৰিছ প্ৰশাসনক বাংলাদেশত হিন্দুসকলৰ ওপৰত হোৱা হিংসা ৰোধ কৰিবলৈ সকলো ধৰণৰ ব্যৱস্থা গ্ৰহণ কৰিবলৈ আহ্বান জনাইছে।
প্ৰসংগ ক্ৰমে বাংলাদেশৰ অন্তৱৰ্তীকালীন চৰকাৰে আটক কৰি ৰখা নাগৰিক অধিকাৰ কৰ্মী তথা পুৰোহিত চিন্ময় কৃষ্ণ দাসে জিম্মাত থকা অৱস্থাতো জীৱনৰ প্ৰতি গুৰুতৰ ভাবুকিৰ সন্মুখীন হৈছে।আৰু বাংলাদেশত হিন্দুসকলৰ ওপৰত হিংসাত্মক ঘটনা সন্দৰ্ভত শীতকালীন অধিৱেশনৰ লিখিত প্ৰশ্নৰ উত্তৰত বৈদেশিক পৰিক্ৰমা মন্ত্ৰী এছ জয়শংকৰে কয় যে ঢাকাত থকা ভাৰতীয় উচ্চায়ুক্তই বাংলাদেশৰ পৰিস্থিতিৰ ওপৰত তীক্ষ্ণ দৃষ্টি ৰাখিছে। আৰু বাংলাদেশৰ সংখ্যালঘুসকলৰ নিৰাপত্তা প্ৰদান কৰা অন্তৱৰ্তীকালীন চৰকাৰৰ প্ৰাথমিক দায়িত্ব বুলি উল্লেখ কৰে।
Continue Reading
