বাংলাদেশত ৩৩ হাজাৰ পূজা মণ্ডপ; সুৰক্ষা প্ৰদান কৰিব মাদ্ৰাছাৰ ছাত্ৰ-ছাত্ৰীসকলে

বাংলাদেশৰ ৰাজনৈতিক পট পৰিৱৰ্তনৰ পাছত কোনো বাধা বিঘিনি নোহোৱাকৈ দুৰ্গাপূজা উদযাপন কৰিবৰ বাবে বাংলাদেশৰ অন্তৱৰ্তীকালীন চৰকাৰে নিৰাপত্তা ব্যৱস্থা কটকটীয়া কৰি তুলিছে৷ ধৰ্মীয় পৰিক্ৰমা উপদেষ্টা এ এফ এম খালিদ হোছেইনে, মাদ্ৰাছাৰ ছাত্ৰ-ছাত্ৰীসকলে সুকলমে দুৰ্গাপূজা উদযাপন কৰাৰ ক্ষেত্ৰত সহায়ৰ হাত আগবঢ়াবলৈ ইচ্ছা প্ৰকাশ কৰিছে বুলি সদৰি কৰিছে। পূজা সমিতিয়ে সন্মতি প্ৰকাশ কৰিলে স্বেচ্ছাসেৱক হিচাপে কাম কৰিবলৈ ইচ্ছা প্ৰকাশ কৰিছে মাদ্ৰাছাৰ ছাত্ৰ-ছাত্ৰীসকলে। চৰকাৰে দুৰ্গা পূজাৰ অনুদান ৩ৰ পৰা ৪ কোটি টকালৈ বৃদ্ধি কৰিছে। এই চাৰি কোটি টকা জিলা প্ৰশাসনৰ জৰিয়তে দুখীয়া মন্দিৰ সমূহত বিতৰণ কৰা হ’ব বুলি সদৰি কৰিছে। মঙলবাৰে ঢাকাৰ সচিবালয়ৰ ধৰ্মীয় মন্ত্ৰালয়ৰ সভাকক্ষত দুৰ্গা পূজাৰ আইন-শৃংখলা সন্দৰ্ভত আয়োজিত বৈঠকৰ অন্তত ধৰ্মীয় পৰিক্ৰমা উপদেষ্টাগৰাকীয়ে সাংবাদিকৰ আগত এই সম্পৰ্কে অৱগত কৰিছে৷

গৃহ পৰিক্ৰমা উপদেষ্টা তথা অৱসৰপ্ৰাপ্ত লেফটেনেণ্ট জেনেৰেল এম.ডি. জাহাংগীৰ আলম চৌধুৰীয়ে সভাপত্তিত্ব কৰা এই বৈথকত ধৰ্মীয় উপদেষ্টা এ এফ এম খালিদ হোছেইনে সদৰি কৰা অনুসৰি নিৰাপত্তাৰ বাবে সমগ্ৰ দেশত সামগ্ৰিকভাৱে আইন-শৃংখলা কঠোৰ হ’ব বুলি সদৰি কৰিছে। এই বৈঠকত বাংলাদেশ পূজা উদযাপন পৰিষদৰ সভাপতি বাসুদেৱ ধৰ আৰু সাধাৰণ সম্পাদক সন্তোষ শৰ্মা, বাংলাদেশ হিন্দু বৌদ্ধ খ্ৰীষ্টান ঐক্য পৰিষদৰ যুটীয়া সাধাৰণ সম্পাদক ঢাকাৰ সভাপতি মনিন্দ্ৰ কুমাৰ নাথ মহানগৰ ৰাজহুৱা পূজা সমিতি জয়ন্ত কুমাৰ দেৱ আৰু সাধাৰণ সম্পাদক ড. তপস পাল উপস্থিত থাকে।

উল্লেখযোগ্য যে ৯ অক্টোবৰৰ পৰা ১৩ অক্টোবৰলৈ শাৰদীয় দুৰ্গা পূজা পালন কৰা হ’ব। এতিয়া দুৰ্গাপূজাৰ আয়োজনত ব্যস্ত হৈ পৰিছে সমগ্ৰ দেশ সেই অনুসাৰে শান্তি-শৃংখলা বৰ্তাই ৰাখিবলৈ তৎপৰ হৈ পৰিছে প্ৰশসনো৷