মানকাচৰৰ ইউকো বেংকত সংঘটিত হোৱা ডকাইতি কাণ্ডৰ লগত জড়িত তিনি অভিযুক্তক গ্ৰেপ্তাৰ

ডিজিটেল ডেস্ক : মানকাচৰৰ ইউকো বেংকত সংঘটিত হোৱা ডকাইতি কাণ্ডৰ লগত জড়িত তিনি অভিযুক্তক গ্ৰেপ্তাৰ। বেংকটোৰ পৰা ১২ লক্ষাধিক টকা ডকাইতি কাণ্ডত জড়িত থকাৰ অভিযোগত গ্ৰেপ্তাৰ বেংকটোৰে তিনি কৰ্মচাৰী।

ধৃত ছাহিল আঞ্জুম,অময় দ্বিপ ৰয় আৰু আৰিহান্দ হৰিজান। ইয়াৰে ছাহিল আঞ্জুম বেংকটোৰ শাখা প্ৰৱন্ধক, অময় দ্বিপ গাননিক বিষয়া হোৱাৰ লগতে চতুৰ্থ বৰ্গৰ কৰ্মচাৰী হৈছে আৰিহান্দ হৰিজন।

উল্লেখ্য যে শুকুৰবাৰে মানকাচৰৰ ইউকো বেংকত সংঘটিত হয় ডকাইতিৰ ঘটনা। পিছে ঘটনাক কেন্দ্ৰ কৰি বেংটোৰ একাংশ কৰ্মচাৰীয়ে মানকাচৰ আৰক্ষীক খবৰ কৰাত মানকাচৰ আৰক্ষীয়ে ঘটনাস্থলীত উপস্থিত হৈ ক্ষিপ্ৰতাৰে তদন্ত চলায়।

আৰক্ষীৰ প্ৰায় ৪ ঘণ্টা তদন্তৰ অন্তত পোহৰলৈ আহে বেংক ডকাইতি হোৱাৰ মূল ৰহস্য। আৰক্ষীৰ অনুসন্ধানত প্ৰথমে বেংকৰ ভিতৰত এটা সৰু কোঠাৰ পৰা ডকাইতি হোৱা ১২ লক্ষাধিক টকাৰ পৰা ৯ লাখ পঞ্চাশ হেজাৰ উদ্ধাৰ কৰে।

একেদৰে বেংকৰ তিনিজন কৰ্মচাৰী ঘৰতো আৰক্ষীয়ে অনুসন্ধান চলাই এজন চতুৰ্থ বৰ্গৰ কৰ্মচাৰীৰ ঘৰৰ পৰা ৪৯ হাজাৰ টকা উদ্ধাৰ কৰে।

উক্ত ডকাইতি ঘটনাৰ তদন্ত ক্ৰমে বেংকটোৰ উল্লেখিত তিনি কৰ্মচাৰীক আটক কৰি সোধ পোচ চলোৱাৰ অন্তত গ্ৰেপ্তাৰ কৰে।